Saints player manto ber Lemina
Southampton chuan an club player manto ber ni turin Juventus midfielder Mario Lemina chu pound maktaduai 16-in an lalut a, a man hi pound maktaduai 2-a la pung chho thei a ni bawk.
Gabon international hian tun hnai season hnih chhungin Juventus tan match 42 a khel a, player ṭha tak ni mah se Turin club tan rinrawl a ni phak meuh lo, kum 23 mi Lemina hian Saints tan kum nga daih contract a ziak.
Lemina hian Lorient aṭangin football nun bul a ṭan a, kum 2015 khan Juventus chu loan hmangin a zawm a, April 2016 khan Turin club tan hian kum li daih contract a ziak. Serie A club tan hian Serie A leh Coppa Italia nomawi vawi hnih ve ve a chawi hman a, season hmasa Champions League final-ah khan Real Madrid hmachhawntu zingah a tel ve phak.
Saints vice-chairman Les Reed chuan, "Mario hi player theihna nei sang bikte zinga mi a ni a, a kum la tam lo mah se tawnhriat a ngahtawhin nomawi pawh a chawi hnem tawh. Juventus tana khel tawh a nih avangin a tawnhriat hi a ṭangkai dawn a, a vanglai hun hmang chho mek a nih avangin kan tan thil ṭha a tih ngei kan beisei," tiin a sawi.
Southampton hian thla hmasa khan Poland Under-21 defender Jan Bednarek chu pound maktaduai 5 in an lalut tawh a, tun dinhmunah an captain Virgil van Dijk chu Liverpool laka chan mai thei dinhmunah an ding mek. Saints hian season thara an league match hmasa ber atan Inrinni zan hian Swansea City an mikhual ang.