Van Niekerk khing zo an awm lo

South African track and field sprinter Wayde van Niekerk chuan mipa 400m intlansiakah amah khing zo a hmu lo. Thawhlehni zan khan London Stadium-ah World Athletics Championship 400m final tlan a ni a, Niekerk chuan second 43.98 chhunga thlengin pakhatna a ni.

Kum 25 mi Niekerk hian nikum khan Rio Olympic-ah 400m inelna huangah hian gold medal a la tawh a, tun ṭumah hian Brazil khawpuia a hun hman aiin second khat velin a hmang rei zawk - hetichung hian pahnihna Steven Gardiner aiin second 0.43 in a thleng hma zawk a, pathumna chu Abdalelah Haroun a ni thung.

Mipa 400m intlansiakah hian Niekerk khing phak tur bera ngaih Isaac Makwala chu a inlan lo. Kum 30 mi Makwala hian harsatna nei loin London a pan a, inelna neihna hmunah a dam loh avangin 200m leh 400m-ah inlan theih ngei beisei mah se a dam hman mai loh avangin a tan intlansiakna track-ah luh theih a ni lo.

Van Niekerk chuan, "Mak­wala dinhmun ka ngaihtuah a, ka khawngaih hle. Inelna neih hmain kan inhmu a, inchibai pahin dam leh thuai tura ka duhsak thu ka hrilh. Hliam leh dam lohna hi infiamnain a ken tel a nih miau vangin a chang chuan sports hi a nunrawng ṭhin a ni," tiin a elpui inlan thei lo chungchang a sawi.

Damloh avanga inlan thei lo Makwala chuan, "Intlansiak ka hmachhawn theih ngei nan theihtawpin hma kan la a, mahse ka tan Stadium chhung luh a rem ve ta ngang lo," tiin a sawi.

Feet 6-a sang Van Niekerk hi Bolt anga palian leh sang a ni lem lo a, thahrui erawh a ngah hle. Jamaican sprinter ropui Bolt a chawlh dawn takah chuan Olympic leh World Championship gold medal kawl kawptu Van Niekerk hi intlansiak khawvelah chuan mipui ngaihven leh hmuh duh ber pakhat a ni chho thei ngei tura ngaih a ni.

World Championship-a gold medal pahnih hlawh chhuak tawh Van Niekerk chuan, "Khawvel huap intihsiaknaa pakhatna nih hi ka tan chuan a lawmawm em em a, 2016 khan 400m inelnaah hian gold ka la tawh bawk a, tuna mi nen hian a hlut dan a danglam chuang lo," a ti.

Rio Olympic-ah khan Van Niekerk hian 400m chu second 43.03 chhunga thlengin Olympic gold medal hmasa ber a la a, hemi ṭuma world record a siam hi khum thei an la awm lo.