Neymar vanga France pan lo Sneijder

French Ligue 1 club Nice tan season khat chhung khel tura contract ziak hlim Wesley Sneijder chuan tun hnaiah player langsarin France an pan vanga Ligue 1 club zawm a nih loh thu a sawi a, pound maktaduai 200-a Paris Saint-Germain pantu Neymar-a thutluknain amahah nghawng a neih loh thu a sawi.

Real Madrid midfielder hlui chuan, "Talent leh player ṭhaten league hi an chawisang thei ngei a, mah se dik taka sawi chuan anni vanga France pan ka ni lo. Ka tana pawimawh ber chu team a ni a, Nice-ah hian player ṭha tak tak, rilru puthmang dik tak pu an awm tih ka hria. Anni vangin he hmun hi ka lo pan a, Zlatan Ibrahimovic-a'n France-a a lo khelh tawh vang emaw Neymar-a'n PSG a zawm vanga he hmuna lokal hi ka ni lo," a ti.

Netherlands international chuan Nice a zawmna chhanah Inter Milan tana a lo khelhpui tawh Mario Balotelli-a ṭangkai anga an sawi chu a pha a, Nice-ah chuan chawl hahdam mai mai tura kal a nih loh thu a sawi bawk.

Sneijder chuan, "Hnehna chan zel duh mi ka nihna mizia hi tun thlengin ka la thlak lo a, a tlawm zawk nih ka duh ngai lo. Nice khawpuiah hian khawsak a nuam em em tih ka hria a, mah se Milan leh Madrid-ah pawh chutiang tho chu a ni. Balotelli nen kan inhre ngei a, mah se club ka zawm dawnin player niloin coach leh director-te ka titi pui ṭhin," a ti.

Nice hian Champions League playoff-ah Napoli an la hmachhawn dawn a, Sneijder chuan, "Napoli hi ka hria a, mah se anni hneh turin chance kan nei a ni. A pawimawh hmasa ber chu rinna neih a ni a, chu rinna nen chuan engkim kan ti thei ṭhin. Kum 2010-ah khan Inter tan Champions League nomawi kan chawi kan ring lo a, mah se kan khelh zel hnuah inrintawkna nena beiin chu chuan treble champion min nih tir a ni," tiin a sawi.