Football field avangin sorkarin sum a hmu tam - Sports Minister

Mizoram chhunga football inelna sang ber Mizoram Premier League Season 9 khuhhawnna chu Ningani zan khan Dawrpui Multipurpose Hall-ah neih a ni a, Mizoram sports minister Robert Romawia Royte-in a kickoff.

MPL KickOff-ah MFA hruaitute, infiamna lama hruaitu hrang hrang bakah MPL team player leh official te an kal ṭha hle. Khuallian Robert Romawia Royte chuan MPL club zawng zawng hnenah ball 20 a pek vek tur thu a sawi a, MSSC kal tlangin MPL zan inkhelh huna light chhitna senso engemaw zat tum an inhuam thu a sawi lang bawk.

Sports minister Robert Romawia chuan, "Kan football field aṭang hian Mizoram sorkar Finance Dept-te hian sum an hmu tam khawp mai. Artificial grass hi GST rate chu 28% a ni a, Central sorkarin phullem phahna tur sum min lo pek hian GST aṭanga sum hmuh 50% chu Mizoram sorkarin a chang. Mizoram sorkarin inkhel ve hlei loin sum an lalut ṭeuh ṭeuh a ni," tiin artificial turf phah chu Mizoram sorkarin a hlawkpui thu a sawi.

Artificial turf hi Aizawla phah zawh tawh chu Lammual leh RG Stadium a ni a, Lammual bik chu siam ṭhat leh a ṭul tawh. Mizoram chhungah MFA Ground chhiar telin artificial turf hman theih 17 a awm tawh. Football turf hi Aizawl (2), Lunglei (2), Champhai (2), Serchhip (1), Siaha (1), Kolasib (2), Lawngtlai (1), Saitual (1), Khawzawl (1), Hnahthial (1), Chawngte (1), Lengpui (1) leh Sairang (MFA Ground) ah te a awm tawh a ni.

MFA leh a thawhpui Zonet fak chhunzawmin Robert Romawia chuan, "MFA-ten thiam takin ro an rel a, football hmasawnna tura an hmalakna hi a ropui hle. Football tihhmasawnna tura sponsor-tute chungah lawmthu ka sawi bawk. Zonet Cable TV-te football hmasawn nan an thawh hlawk hle. Football-a an thawh hlawkna te, sports tana ab thawh hlawkna te hi sports hmangaihtuten kan hria a, kan ngaisang hle. An thil tih ṭhat hi chhunzawm zel se kan duh a ni," tiin a sawi.

MPL-ah hian offical ball partner hi Nivia a ni a, MPL9-ah hian 'Nivia Dominator 3.0' pet a ni dawn a, Nivia-in inelnaa hman tur zawng zawng ball hi a rawn tum dawn a ni. Ball pakhat man hi Rs 1600 vel a ni a, MPL club tan ball 20 ṭheuh an dawng tur hi chanchin lawmawm a tling.