AIFF President thar Kalian Chaubey

All India Football Federation president turin Kalian Chaubey chu thlan tlin a ni a; Mizoram Football Association aiawh Lalnghinglova Hmar chu Executive Committee Member atan thlan a ni bawk.

Nimin khan Football House, New Delhi-ah AIFF hruaitu thar thlan a ni a, Gujarat state aiawhtu footballer hlui Kalian Chaubey hian India football captain hlui Bhaichung Bhutia chu vote 32 (33-1) in a hneh a ni.

Vice President inthlanah NA Harris, Karnataka chuan Marvender Singh, Rajasthan chu vote 24 (29-5) in a hneh a; Treasurer-ah Kipa Ajay, Arunachal Pradesh chuan Gopalakrishna Kosaraju, Andhra Pradesh chu vote 31 (32-1) in a hneh a, vote thi pakhat a awm.

AIFF Executive Committee Member atana thlan tlin mi 14-te hi chuhpuitu awm loa thlan tlin vek an ni a, an zingah MFA Honorary Secretary leh Deepak Sharma, Himachal Pradesh-te chiah hi AIFF term hmasaa hruaitu thlan nawn an ni.

AIFF dan tharah chuan President, Vice President leh Treasurer pakhat ṭheuh bakah Executive Committee member mi 14-te hi Office Bearers tih vek an ni a, a zawnin term thum (kum 12) aia rei an chelh thei lo ang.

President thar
AIFF President thar Kalian Chaubey hi footballer hlui a ni a, India goalkeeper hlui niin tunah hian politician ni tawhin BJP mi leh sâ a ni a, West Bengal lam chhuak niin tunah hian Gujarat ai a awh thung.

Tata Football Academy aṭanga inzir chhuak a ni a, Mohun Bagan, East Bengal, Bengal Mumbai leh Salgaocar tan a khel tawh a, Indian goalkeeper of the year-ah vawi hnih thlan ni tawh mah se India senior team tan a inlan lo - squad-ah chuan a awm fo thung.

Chaubey hian inkhelh a chawlhsan hnuah 2010-13 khan Mohun Bagan academy-ah CEO hna a thawk a, naupang chanhaiten football an khelh ve theihna tura Kolkata Police leh British Council-in an ruahman GOALZ Project-2012-ah Co-ordinator a lo ni tawh a, Bajaj Allianz Youth Talent hunt-ah technical director (2011-13) lo ni tawhin, kum 15 hnuai lam naupang 70,000 vel chu India ram khawpui hrang hrang 37-ah an thlang chhuak a, a thiam zual chu Bayern Munich academy-ah training an neih tir.

Kum 2015 khan BJP a zawm a, 2019-ah Lok Sabha election hmachhawn mah se Indian politician hmeichhe thawm na tak Mohua Moitra chu a ngam lo a ni.

A chhehvel
AIFF President thar thlannaah hian State leh UT aiawh 34-in vote an thlak a, State 33-in Chaubey an vote a, Bhaichung vote-tu state pakhat chiah an awm tihna a ni. Chaubey hi Indian footballer zinga AIFF President ni thei hmasa ber a ni nghal.

Executive committee member atana thlante hi GP Palguna (Telangana), Avijit Paul (Odisha), P Anil Kumar (Kerala), Valanka Natasha Alemao (Goa), Maloji Raje Chhatrapati (Maharashtra), Menla Ethenpa (Sikkim), Mohan Lal (Chhatisghar), Arif Ali (Uttarakhand), K Neibou Sekhose (Nagaland), Lalnghinglova Hmar (Mizoram), Deepak Sharma (Himachal Pradesh), Vijay Bali (Punjab), Syed Hasnain Ali Naqvi (Madhya Pradesh) leh Syed Imtiaz Husain (Bihar) te an ni. AIFF dan thar angin footballer hlui paruk Bhaichung, I M Vijayan, Shabbir Ali, Climax Lawrence, Pinky Bompal Magar leh Thongam Tababi Devi te chu ruat an ni bawk.

AIFF vice president NA Harris hi Congress MLA ni lai a ni a, treasurer Kipa Ajay hi Arunachal Pradesh FA Secretary ni lai a ni thung.