Man United mualah Arsenal

Premier League match nga chak zawn tawh Arsenal chu Manchester United khelmualah an lenglut dawn. Erik ten Hag-a naute hi tun hnaia vawi thum chak zawn ve tho an ni, an in hlau lo tawn viau ang.

Season ṭan dawn kha chuan Man United leh Gunners te hi champion tura rinkai an ni lem lo, amaherawhchu club lian dang an chesual ve fo a, chu bakah tunlaia an khelh ṭhat avangin nomawi an sawi ri ngam - khelh hmabak erawh an la ngah hle.

United thar
"Captain nih vangin inkhel bul ṭan reng tur tihna a ni bik lo," tiin Ten Hag-a'n Southampton an hmachhawn dawnah a sawi a, captain Harry Maguire bakah player dangte pawh thlak theih leh bench lama ṭhu thei an ni, a tihna a ni.

Man United manager thar hian team thar din a tum, chumi bul ṭan nan chuan tlarhnung a siksawi nasa ber. Ajax lama a hman thiam Lisandro Martínez chu Raphael Varane nen a inkawp tir chat a, a ti sual lo - an match hnuhnung pathumah vawi hnih goal an chhuah lo.

Martinez leh Varane te bawk hi Arsenal lakah pawh an inkawp leh ang, 5ft 9in a sang defender Martinez hian Gabriel Jesus dan a tum dawn, season hmang ṭha tak pahnih in nawk vel hi a hmuhnawm ang.

Tlarhnung lai chauh a ni lo, a sirah pawh Luke Shaw leh Aaron Wan-Bissaka tan hmun a awm lo. Diogo Dalot leh Tyrell Malacia ten hmun an chang zawk a, anni pahnih hi goal venhim bakah Jadon Sancho leh Anthony Elanga te an thlawp ṭha ṭhin.

Antony an neih belh a, a inlan nghal dawn em, a la hriat loh. Brazil international hi a inkhel a nih chuan Christian Eriksen leh Casemiro ten an thlawp dawn, season hmasa lama Man United kan hmuh ang ni loin 'United thar' kan hmu dawn.

Arsenal an phur
Premier League hmahruaitu an ni miau a, an phur viau hi a mak lo. Mikel Arteta naute hian Old Trafford aṭanga point thum hlawh chhuak tur erawh chuan thapui an thawh a ngai dawn, phur sual palh a awm thei ang.

Jesus an neih vangin an phur a, an chakna hnar pawimawh a ni. Tlarhnung erawh sawi hmaih a thiang lo - William Saliba hoin an nghet thei hle. Match nga aṭangin goal li an chhuah, an goal chhuahte hi team tihsual ni loin mimal tihsual a ni hlawm.

Arteta-a'n Aston Villa an hneh ṭumin Ben White a la chhuak a, hei hi United hmachhawn turin a hahchawlhtir nia ngaih a ni. Tlarhnunga an buai theihna tur pakhat chu Oleksandr Zinchenko a ni, ani hi hliam vangin a dinhmun a chiang lo.

Zinchenko awm lo mah se Kieran Tierney a khel thei, mahse Tierney hian ṭhenkhatah Zinchenko a phak lo, a bik tlakin tlarhma puih kawngah an hriam loh phah deuh - goal ven kawngah erawh duhthlan tur bik awm loin an intiattawk viau.

Thomas Partey inhliam hi Man United tan chanchin lawmawm a ni ang, a aiawhtu Mohamed Elney a inhliam leh zel bawk. Villa laka bul ṭantu, kum 22 mi Albert Sambi Lokonga tan team lian laka fiahna a ni thei dawn.

Foxes ngamtu United
Manchester United hian Ningani zan khan Leicester City 1-0 in an hneh, goal awmchhun hi Jadon Sancho-a'n minute 23-naah a khung, a siamsaktu chu tlarhma laia tlan Marcus Rashford a ni thung.

Man United keeper David de Gea chuan James Maddison-a freekick ropui takin a dansak a, mualneitu Foxes lamin goal nawr nat an tumna chhuchat turin Casemiro dah luh a ni a, inkhel thunun chhunzawm chungin point thum an hmu.

Bench aṭangin Cristiano Ronaldo dah luh a ni a, goal erawh a keng tel lo. Manager thar Ten Hag-a'n EPL bikah Ronaldo hi vawi khat chiah bul a la ṭantir, pre season a hman ṭhat loh bakah kum 37 mi Ronaldo hi rinrawl atan neih a tum lo niin a lang.

Kum 2021 April thla hnua a vawi khat nan Man United hian a zawnin match thum hnehna an chang. Liverpool, Southampton leh Leicester an hneh a, point kua hmuin table-ah pangana an ni - Reds leh Chelsea chungah an awm.

Chak lo Leicester erawh an talbuai chhunzawm, defender Wesley Fofana chhuahsan team hian match nga aṭangin point khat chauh an la nei, a hniam ber an ni. Pathianni zan dar 6:30-ah Brightlon an lenchilh dawn a ni.