Transfer a tawp; sum hman a tam

European top five league-a transfer bazar chu tukin zing khan khar a ni ta a, Premier League, La Liga, Bundesliga, Ligue 1 leh Serie A ten tun nipui transfer-a sum an sen hi pound tluklehdingawn 4.6 a tling!

Transfer tawp zana thil thleng langsar bera chhal ngam chu Chelsea-in Barcelona aṭanga Pierre-Emerick Aubameyang an lakluh chu a ni a, Marcos Alonso chuan Chelsea chhuahsanin Barca a zawm bawk.

Bazar zo tawha inngai Liverpool-in an result leh hliam avangin midfielder thar an melh a, transfer tawp niah Arthur Melo chu Juventus aṭangin season khat chhung atan loan-in an hawh.

Manchester United-in pound maktaduai 82-a Antony an lakluh chu transfer tawp nia player man to ber record a ni a, hetihlai hian transfer thleng ngei tura ngaih, thleng ta lem lo a awm nual bawk.

Ka lo haw
Arsenal striker hlui Aubameyang-a'n Barcelona tan season khat pawh a khelh hmain Nou Camp a chhuahsan lehnghal a, London khawpuiah bawk kirin Chelsea a zawm - a man zat hi £10.3mtd a ni.

Kum 33 mi Auba hian February thla khan Barca hi free transfer-in a zawm a, match 24-ah goal 13 a khung hman. Stamford Bridge-ah hian kum hnih chhung atan contract a ziak.

Auba hi Borussia Dortmund-ah tuna Chelsea boss Thomas Tuchel hnuaiah a lo khel tawh a, match 95-ah goal 79 khungin manager pakhat hnuaia goal a khung hnem berna niin, goal 38 ngawtin manager dang hnuaiah aiin a khung tam.

Blues hian Juventus midfielder Denis Zakaria chu season khat chhung atan loan-in an hawh bawk a, an duh chuan a nghetin an lalut zui thei ang. Chelsea hian nipui bazar-ah £255.3mtd an seng a, transfer window khata English club-in sum an sen hnem ber record a ni.

Liverpool-ah Arthur
Premier League-ah beisei angin Liverpool-in season bul an ṭan lo a, transfer bazar hmang zo tawha inngai Jurgen Klopp-a'n, "Midfielder kan mamawh a, mamawh loa ka inngai kha ka tisual a ni," a ti a, tunah chuan Arthur Melo an nei ta.

Kum 26 mi Arthur hian season khat chhung atan Reds hi loan-in a zawm a, Liverpool hian loan-a hawh manah £3.9mtd an inseng a, season tawpah an duh chuan £32.4mtd-in a nghetin an lalut thei dawn.

Brazil tana vawi 22 inlan tawh Arthur chuan, "Khelmuala ka duhthusam chhunzawm a, Liverpool tana ka theihna zawng zawng ka hlan thei tur hi ka lawm hle," a ti a, Reds-ah Brazilian Alisson Becker, Roberto Firmino leh Fabinho an awm sa avangin a mikhual lo ang.

Liverpool khaw club Everton chuan an midfielder hlui Idrissa Gueye chu Paris St-Germain aṭangin £2mtd-in kum hnih chhung atan an la let a, Manchester United midfielder James Garner chu £9mtd-in an lalut bawk.

Premier League
English top flight league hoin transfer bazar-ah pawh ngaihven an hlawh ber lo thei lo - Nottingham Forest chuan player 21 ngawt an lalut a, transfer window khata British club bazar hnem ber record an siam.

Arsenal midfielder hlui Willian chu Premier League-ah a lo kir leh ta a, Fulham a zawm. Kum 34 mi hian kum khat atan contract a ziak.Fulham hian Leeds United winger Dan James leh PSG left back Layvin Kurzawa chu season khat chhung atan loan-in an hawh a, Carlos Vinícius chu Benfica aṭangin kum thum atan a nghetin an la bawk - a man zat tarlan a ni lo.

Match ngaa vawi khat chiah la chak Aston Villa pawh transfer tawp niah an bazar a, Wolverhampton Wanderers midfielder Leander Dendoncker chu £13mtd-in an lalut a, Southampton aṭangin centre back Jan Bednarek chu loan-in an hawh bawk.

Arsenal midfielder Ainsley Maitland-Niles chuan season khat atan Southampton chu loan-in an hawh a, Marseille aṭangin centre back Duje Caleta-Car chu kum li chhung atan an lalut a, City aṭangin Samuel Edozie (£10mtd) leh Juan Larios (£6mtd) an lei bawk - player pahnih hi City-in an lei let theihna dan leh, Saints-in an hralh a, sum an dawn ve theihna dan a inziak tel.

Thleng ta lo
Champions League khelh châk Cristiano Ronaldo-a'n Manchester United chhuahsan dil mah se, Old Trafford-ah a cham a, Red Devils hian Frenkie de Jong chu Barcelona aṭanga £63.5mtd-a lalut turin inremna neihpui mah se an la ta lo bawk.

Everton winger Anthony Gordon chu Chelsea-in pound maktaduai 60 thlengin an ngam nia sawi ni mah se, a chhuak ta lo a, Arsenal-in Aston Villa midfielder Douglas Luiz lakluh tum mah se vawi hnih an hlawhchham a, £23mtd chu Villa chil tiput tham a ni lo.

Leeds United-in Bamba Dieng an lalut dawn emaw an inti hman a, club chairman Andrea Radrizzani chuan twitter-ah a tarlang hman hial. Mahse, Leeds pan tura thlawhtheihna ṭum hmuna a awm laiin Nice an lo lang.

Marseille forward hian Ligue 1 club hi a zawm dawn niin a lang hman a, mahse, medical a paltlang hman loh avangin Marseille tan bawk a khelh chhunzawm dawn.