Pathianni zanah India Vs Pakistan?

Asia Cup super 4 chu zanin aṭangin khelh ṭan a ni dawn. Nizan lamah thil mak danglam a thleng a nih ngawt loh chuan September 4, Pathianni zan dar 7:30 hian India leh Pakistan te an inkhel leh dawn a, cricket hmuhnawm bik thlir tur a awm leh ang.

Asia Cup-ah hian team paruk an tel a, group pahnihah team thum ve vein an inṭhen. Group B-ah Afghanistan-in Bangladesh leh Sri Lanka hnehin super 4 an lut a, Ningani zan khan Sri Lanka-in Bangladesh hnehin a sang pali zingah an inhlangkai leh bawk. Zanin dar 7:30 hian Sri Lanka leh Afghanistan te super 4 match hmasa ber an khel ang.

Group A-ah India, Pakistan leh Hong Kong te an awm. Men in Blue-in match hnih an khelhah hnehna an chang ve ve a, Rohit Sharma hote hnung zui tur hi kan hre hman lo. Nizan khan Pakistan leh Hong Kong an inkhel a, heta chak zawk hian super 4 an lut dawn.

Lions an tho chhuak
Dubai International Stadium-ah Sri Lanka-in vawm hmasak an thlang a, Bangladesh-in 183/7 runs an siam a, chakpui tham a ni. Amaherawhchu Lions tan opener Kusal Mendis-a'n ball 37 lekah 60 runs a siam a, captain Dasun Shanaka-a'n ball 33-ah 45 runs a siam bawk.

Sri Lanka hian ball li dah bangin 184/8 runs an siam a, inkhel boruak sangah hnehna chang hramin super 4 an lut. Lions hian Asia Cup match hmasa berah Afghanistan hi an ngam tawh lo a, zanin hian phuba lak an tum ang.

Part II chu
Asia Cup ti ngaihnawmtu chu India leh Pakistan te hi an ni a, group match-a an inkhelh kha part I tiha sawi a ni. Cricket ram ṭha pahnih an nih bakah an inhal avangin entu pawh an ṭhahnem hle.

Cricket ngainatute part II hi a thlen ngei an ring a, hetah pawh hian an la duhtawk lo. Final-ah pawh India leh Pakistan hmuh ngei an duh a, part III hi thil awm thei a nih chuan final duhthusam tiha sawi theih a ni ang.

Batsman ṭha mi Babar Azam-a hote hi Hong Kong laka chesual tur chuan an ṭha mah mah a, India nen an inkhel nawn leh a nih ngat chuan Virat Kohli vs Babar Azam ni ringawt loin India batter-ten Mohammad Nawaz leh Naseem Shah an hmachhawn dan tur ringawt pawh hian chil a ti put nasa hle. Chutihrualin nizan lamah Shaheens hian Hong Kong an hneh lo a nih erawh chuan a ho der ang.

Super 4
Zanin Inkhel Tur
Sri Lanka 7:30 PM Afghanistan
September 4, Pathianni
India 7:30 PM Pakistan/Hong Kong
September 6, Thawhlehni
India 7:30 PM Sri Lanka
September 7, Nilaini
Pakistan/Hong Kong 7:30 PM Afghanistan
September 8, Ningani
India 7:30 PM Afghanistan
September 9, Zirtawpni
Sri Lanka 7:30 PM Pakistan/Hong Kong

Final
September 11, Pathianni - Dubai International Stadium

Bundesliga
Zanin Inkhel Tur
Bayer Leverkusen 7:00 PM Freiburg
Union Berlin 7:00 PM Bayern Munich
Wolfsburg 7:00 PM FC Cologne
Bochum 7:00 PM Werder Bremen
Stuttgart 7:00 PM Schalke 04
Eintracht Frankfurt 10:00 PM RB Leipzig
September 4, Pathianni
Augsburg 7:00 PM Hertha Berlin
Borussia M'gladbach 9:00 PM Mainz