Fognini lakah Nadal a tho chhuak

Set khatna a hloh a, set hnihnaah pawh 4-2 in a hniam zawk hman - Rafael Nadal dinhmun a ṭha lo hman hle. Mahse, darkar hnih leh minute 43 an khelh zawh hnu chuan Nadal hi 2-6, 6-4, 6-2, 6-1 in a chak leh daih.

Inkhel tawp dawn lamah Nadal hian a hnar a ti na palh, thisen chhuak hial mah se a inkhel zo thei. US Open third round a inhlangkai a, a match lehpekah chuan Richard Gasquet a hmachhawn dawn a ni.

Grand Slam vawi 22 champion tawh Nadal chuan, "Tennis ka khelh tawh chinah a bul ka ṭan fuh loh berte zinga mi a la ni hial ang. Mahse, dawhthei taka nghah a ngaih chang a awm, chutiang hun chu ka tawng a ni," tiin a sawi.

Nadal-a'n a tihsual vangin point 37 teh meuh a hloh a, round sangah chuan tihsual avanga khingpuite point pek hnem a pawi ṭhin. A vawi nga nana US Open champion nih a duh chuan insiam ṭhat a mamawh dawn.

Inkhel dangah Gasquet chuan seeded 32-na Miomir Kecmanovic chu 6-2, 6-4, 4-6, 6-4 in a lo hneh ve thung. 2013 khan Gasquet hian US Open semifinal a lo thleng tawh, tun ṭumah pawh hian a chet fuh ni chuan player ṭha hneh thei tur a ni ang.

Nadal ang bawka Spanish tlangval Carlos Alcaraz pawh a chak. Kum 19 mi Alcaraz hian Federico Coria chu 6-2, 6-1, 7-5 a hnehin third round a inhlangkai, hnehna chang tur hian darkar hnih leh minute 10 a mamawh a ni.