Sum hmang thiam Man City

Premier League champion Manchester City-in tun nipui bazarah player hralhna aṭangin pound maktaduai 182.7 zet an lalut. Citizens hian tun nipuiah Erling Haaland, Kalvin Phillips, Sergio Gómez, Manuel Akanji leh Stefan Ortega te lakluh nan pound maktaduai 134.5 seng mah se an hlawkna hi pound maktaduai 48.2 a la ni pha.

Pep Guardiola hote ropuina tak erawh transfer aṭanga an hlawk chungin khelmualah an chhiat phah lo. City hian Erling Haaland an kawl avangin Premier League nomawi humhim chauh ni loin Champions League nomawi chawi tur pawha rinkai an ni pha.

Zanin dar 10:00 hian Man City hian Aston Villa an tlawh dawn. Hriat tel atana ṭha erawh September 6, Thawhlehni zan hian City-in Champions League-ah Sevilla an tlawh dawn a, kartawpah Tottenham an mikhual lehnghal ang. Pep-a'n Villa ringawt a thlir thiang lo a, an khelh hmabak en chungin player a thlang ang.

City khingpui tur Aston Villa hian match nga aṭangin point thum chauh an la hmu a, relegation zone-ah an awm mek. Liverpool legend Steven Gerrard hi ban theih dinhmunah a ding.

Season liam ta match tawp berah club pahnih hi an inkhel a, minute 75-naah Villa hian 2-0 in hma an la hruai a, a tawpah erawh City 3-2 in a chak a, nomawi an chawi. Villa boss Gerrard chuan City tan harsatna an siam tawh a, tun ṭumah point an hlawhchhuah theih thu a sawi.