Bazar ṭhulh thei lo Barca!

Leiba tam tak nei chunga an bazar reng avangin Barcelona chanchinin ngaihven a hlawh a, transfer tawp hnuah pawh an la bazar dawn - Marcos Alonso nen sawizawm mek an ni a, he thuziak i chhiar meuh chuan an inlalut fel tawh hial ang.

Ningani zan khan transfer khar ni mah se, Alonso hian Chelsea-a a contract chu a titawp a, free agent a nih avangin transfer bazar khar hnuah pawh a duh zawng club pan turin zalenna a nei a ni.

Hetihrual hian Barcelona hian Arsenal full back Héctor Bellerín chu free transfer-in an lalut bawk a, season hmasa kha Real Betis-ah loan-in a khel a, a inzir ṭanna club-ah hian kum khat chhung a cham ang.

Barcelona hian hmanni lawk khan Sevilla aṭanga an lakluh Jules Koundé chu an player zingah an ziak lut ve thei chauh a, an club sum lakluh leh hman dan a inmil loh vang a ni - hetiang boruak karah hian Bellerin leh Alonso hi engtin nge an ziah luh ang, tih chu zawhna awm a ni.

Hun rei tak chhung Barcelona chhuahsan duh lo Martin Braithwaite chuan Nou Camp-ah kum hnih atan contract la nei mah se, a contract a titawp a, kum khata euro maktaduai sarih hlawhtu hian euro maktaduai nga pek a phut a, Barca hian engzat chiah nge an pek, a hriat loh.

Braithwaite hian Espanyol a zawm avangin Bellerin leh Alonso-a a tu emaw zawk hi chu ziah luh mai dan a awm mai thei a, mahse, Catalan club-in chhuak tura an beisei Jordi Alba chu a chhuak hman lo bawk.

Kum 33 mi left back hi Inter Milan-a loan-a kal turin Barca chuan Italian club hi an dawr fel a, mahse, Spanish defender hi a chhuak duh lo a ni!

Barcelona hian zanin dar 12:30-ah league match khel turin Sevilla an lenchilh dawn a, Real Madrid-in zan dar 7:45-ah Real Betis mikhualin, Atletico Madrid chuan zanin dar 10:00-ah Real Sociedad an lenchilh thung ang.