Derby a dang-lam ṭhin - Alisson

Premier League match hnih a zawna an chak hnuin Liverpool chuan vawiin tlai dar 5:00 hian league match khelh tur an nei dawn a, Merseyside derby-ah Everton an lenchilh ang.

Liverpool goalkeeper Alisson Becker chuan derby boruak a danglam bik ṭhin thu sawiin, "Season hmasa kan intawn lai pawh khan Everton talbuai lai tak a ni a, mahse, derby a lo thlen tawh chuan team danglam daih an ni ṭhin.

"A tawpa result chingfeltu chu chak duhna thinlung nei zawk lam a ni ṭhin," a ti a, Goodison Park-ah theihtawp an chhuah loh chuan tlawm thei dinhmuna an din thu a sawi.

Kum 29 mi keeper chuan match zawng zawng an tana a pawimawh thu sawi zuiin, "Premier League-a match zawng zawng hi kan tan a pawimawh vek a, season tawpah chuan a pawimawh dan a inchen vek zel.

"Derby a ni emaw, a ni lo emaw, point thum a keng vek a, point thum hmu tur leh kan tum ram thleng turin kan hmaa match zawng zawngah theihtawp kan chhuah vek dawn," a ti.

Liverpool striker Darwin Nunez chuan hremna a tuar zo tawh a, Diogo Jota chuan club training a zawm tawh a, hetihlai hian Thiago Alcantara, Naby Keita, Alex Oxlade-Chamberlain, Ibrahima Konate, Calvin Ramsay leh Caoimhin Kelleher an la inhliam a, Newcastle United lakah Jordan Henderson a hliam bawk - Arthur Melo an nei thar thung.