Bayern hmabak a êng

Bayern Munich-in tun nipui bazarah player langsar Robert Lewandowski chan mah se tun thleng chuan an buai phah lo a, an squad thlirin an hmabak a êng hle. Bavarians hian zanin dar 7:00 hian Union Berlin an hmachhawn ang.

Lewy bakah hian Bayern-in Niklas Sule, Tanguy Nianzou, Joshua Zirkzee, Omar Richards, Marc Roca leh player ṭhahnem tak an chhuah a, transfer aṭanga an sum lakluh hi euro maktaduai 110 a tling. Chutihrualin Bavarians hian player lakluh nan euro maktaduai 130 chuang hret an seng tih hriat tel a ṭha.

Julian Nagelsmann-a hote hi league match hnuhnung berah Borussia Monchengladbach nen 1-1 in inhnehtawk mah se DFB Pokal-ah Viktoria Koln chu 5-0 in an sawp. Viktoria laka goal khungtu zinga mi Mathys Tel hian goal a khung hian kum 17 leh mi 126 chauh a ni a, Bayern tana goal khungtu naupang ber a ni.

Ajax aṭanga an lakluh Ryan Gravenberch pawhin Viktoria an hmachhawn ṭumin goal a khung a, Dutch midfielder pawh hi kum 20 mi chauh a la ni. Bavarians squad a chhah ṭha a, Union Berlin lakah point hloh nawn an tum lo ang.