Red Bull hian min la awp thei - Hamilton

Lewis Hamilton chuan tun hnaia Red Bull chet ṭhat dan a hmuh hmaih lo a, kum riat liam ta vel aṭanga amah leh Mercedes team ten Formula 1 an awp bet ang khan, anni pawh hian an rawn awp leh thei mai dawn nia a ngaih thu a sawi.

Mercedes driver Hamilton chuan, "Zep tur a awm lo, hmalam panin chak takin an kal mek. Red Bull hian min awp mek tih chu a takin kan hmu a, team dang tana elphak leh tlan pelh chu a harsa rih mai thei," tiin a sawi a, hneh theih loh an ni bik lo tih erawh a sawi bawk.

Red Bull driver Max Verstappen-a'n tun season intlansiak 14 an hmachhawn tawh zinga pakuaah hnehna a chang thei a, khawl lam chiang lo vanga tlan tluan theih loh ṭum hnih lai a nei bawk - driver championship lamah a kal fal tawh hle.

Britian tlangval Hamilton chuan, "Season khat chhung car chak ber kan nei tawh ṭhin a ni mai thei, season thar a lo nih meuh chuan midangin car chak zawk an lo nei tawh ṭhin, chuvangin midang el phak tur chuan kum tin hmasawn a ngai hle.

"Season riat chhung chu Mercedes khan F1 kan thunun viau, season hmasa khan driver championship lamah erawh kan sang ber ta lo. Kumina a lan danah chuan Red Bull hian hma an sawn nasa ber, anni el phak hi kan tum tur a ni," tiin a sawi.

Pathianni zan dar 6:30 hian CM.com Circuit Zandvoort tlankawngah Dutch Grand Prix an tlan dawn a, chumi hnuah Europe khawmualpuia a hnuhnung atan Italian GP an tlan leh ang, a hnu lamah chuan America lamah an kal dawn.