A naute lakah PSG coach a lungawi

Paris Saint-Germain coach Christophe Galtier chu a naute hun hman danah a lungawi a, match khelh tur an neih tam avangin player ṭhenkhat chuan hahchawlhna hun an mamawh tih a sawi bawk.

Lionel Messi, Neymar leh Kylian Mbappe te an inkawp rem a, season tir lam khan an inkarah neuh neuh awm angin lang mah se, tun hnai an match hnuhnung pahnihah chuan anni pathum hi an ṭangho ṭha hle.

PSG hian zanin dar 12:30 hian Nantes an tlawm dawn, kar leh Thawhlehniah Champions League khel turin Juventus an mikhual zui dawn. Galtier-a tan Ligue 1 chauh ni loin UCL an khelh tur ngaih pawimawh tel a ngai.

Galtier chuan, "Leo, Neymar leh Kylian te chungchang chu sawi loh theih loh, sawi zawh theih loh a ni thung, a khaikhawm nan chuan ka duh angin an khel thei. Anni bakah hian Marco Verratti pawh kan nei, ani hi ball pass thiam bik a ni bawk.

"Mi tam tak chuan player ṭha leh ropui enkawl an harsa an ti ṭhin tih ka hria, kan team erawhin buaina kan nei lo. Hlawhtlinna chan tumin nitin kan bei a, eng match pawh ni se kan ngai pawimawh vek dawn," tiin a sawi.

Zanin Inkhel Tur
Auxerre 8:30 PM Marseille
Lyon 10:30 PM Angers
Nantes 12:30 AM PSG

September 4, Pathianni
Montpellier 4:30 PM Lille
Ajaccio 6:30 PM Lorient
Clermont 6:30 PM Toulouse
Brest 6:30 PM Strasbourg
Reims 6:30 PM Lens
Troyes 8:35 PM Rennes
Nice 12:15 AM Monaco