MPL fixtures a chhuak ta

MPL9 match hmasa ber chu September 8, Ningani chhun dar 12:00 hian RG Stadium-ah khelh a ni dawn a, champion lai Aizawl FC leh Chawnpui FC te an inhmachhawn ang.

Ningani zan MPL KickOff-ah India international player hlui Jerry Zirsanga'n fixture hi a pawt a, MPL Board-in round 7 thlenga inkhel tur a tlangzarh nghal.

Kumin MPL hi RG Stadium leh Lammualah khelh a ni dawn. Ground ṭha zawk RG Stadium-ah round hmasa pali khelh a ni ang a, Lammualah round 5 leh 6 khelh a ni bawk ang.

Round hmasa pathumah zan inkhel a awm dawn lo a, chhun dar 12:00-ah match hmasa zawk khelin tlai dar 3:00-ah match hnihna khelh a ni dawn. Round lina aṭangin zan inkhel a awm ṭan dawn a, tlai dar 4:00-ah match hmasa zawk khelin zan dar 7:00-ah match hnihna an khel ang.

MPL7 thleng kha chuan Lammualah vek khelh a ni a, MPL hnuhnung berah erawh knockout stage chin RG Stadium-ah khelh a ni. Lammual hi 'Mizoram Wembley' ti hiala sawi ṭhin ni mah se a chhiat tawh deuh avangin RG Stadium-a inkhel tam zawk awm hi MPL club-te tan thu lawmawm a tling.

Mizoram deputy chief minister Tawnluia chuan, "Lammual hi I League inkhelh theihna turin chei leh ruahman sorkarin a tum," tiin Inter Village 2022 final-ah a sawi tawh a, chei ṭhat a nih hunah erawh Lammualin ngaihhlut a hlawh leh sawt ang.

Round 1
September 8, Ningani
Chawnpui FC 12:00 PM Aizawl FC
Chhinga Veng FC 3:00 PM Mizoram Police FC
September 9, Zirtawpni
FC Venghnuai 12:00 PM FC Bethlehem
Chanmari FC 3:00 PM Electric Veng FC