Barca dawrna Reds-in an hnawl

Barcelona chuan a vawi hnih nan Philippe Coutinho lakluh tumin dawr mah se Liverpool chuan Catalan club dil­na hi an hnawl - pound maktaduai 200-a Ney­mar hralhtu Barca-in Brazilian midfielder lakluh an tumna zat hi pound maktaduai 90 a ni.

Catalan club hian Coutinho hi an lalut thei a nih chuan pound mak­taduai 76.8 pek phawt a, a khelh ṭhat dan a zira pound maktaduai 13.5 pek belh a ni. Mahse, Reds chuan he dilna hi in­ngaihtuah buai loin an lo hnawl nghal a, "Coutinho hi zawrh lai a ni lo" tiin a vawi hnih nan an sawi leh ta.

Coutinho hian season hman zawh takah khan goal 14 a khung a, kar ruk chhung chu hliam vangin khelmualah a inlan lo. January khan Anfield-ah season nga dang cham turin contract thar a ziak a, a contract-ah hian lei chhuah theihna zat dah tel a ni lo. Brazil international hian, "He club-ah hian cham zel ka duh avangin contract thar ka ziak a, he hmuna khelh zel hi ka tan chuan chawimawina ropui tak a ni," tiin a lo sawi tawh. Reds-ah hian kar khatah £150,000 a hlawh mek a, Liverpool player zingah a aia hlawh hnem an awm lo - Barca hian hei aia tam hlawhtir an inhuam ngeiin a rinawm.

July khan Barcelona hian pound maktaduai 72-in Coutinho hi lakluh an lo tum tawh a, hemi ṭum hian Reds manager Jurgen Klopp chuan, "Hmasawn zel tumin theihtawp kan chhuah mek a, kan tum ram thleng tur chuan kan thawhho zel a ngai a ni. Thil pawimawh tak sawi duh ka neih chu mahni player neih ṭhat lai hralh chi kan ni lo tih hi a ni. Club ropui tak kan ni a, Champions League leh Premier League nomawi chawi duh tan chuan Philippe hi chhuahtir phal chi a ni lo," tiin a lo sawi tawh a, Barca an kian phah lo - sum tam zawk nen an lang nawn leh a nih pawhin a mak lo ang.

Brazil international Coutinho hian January 2013 khan Inter Milan aṭangin Liverpool hi a zawm a, hetih hunlaia a man zat chu pound maktaduai 8.5 a ni.