Chanmar FC-in I League champion an hneh

Great Sports I Day Football-ah H. Vanlalthlanga kaihhruai Chan­mari FC-in Portuguese coach Paulo Menezes-a hnuaia khel Aizawl FC chu 2-1 in an hneh.

Mizo­ram Premier League champion hian 2013-a Thlanga hnuaia an champion hnua a vawi khat nan I Day Football final an lut a, August 15-ah nomawi zawnna hi neih a ni ang.

Nimin Lammual semifinal hmuh­nawm takah Aizawl FC-in Rochhar­zela hmangin minute 17-naah hma an hruai a, Chanmari FC-in hun pek belh minute linaah Thomas Lalengkima hmangin an sut. Extra time-ah Chanmari FC substitute Ṭhasiama'n minute 103-naah chakna goal a khung.

Hmabak êng

Aizawl FC-in coach thar Paulo Menezes hnuaiah leiah ball dahin ball an inpe kual thei a, an khelh dan hmang an thiam bel hunah an hmuhnawm lehzual ang.

Niminah erawh Aizawl FC-in hrem vangin defender Kareem Omolaja Nurain leh Lalhriatrenga te an chhawr thei lo a, tlarhnung a pawp. Portuguese coach hian Mizo player a hriat chian loh an tuar a, bul ṭan tur player a thlang fuh tawk lo niin a a lang bawk.

Chutihrualin I League cham­­pion chak loh chhan ber erawh an vanduai a, minute 90 chhunga chak thei tur an ni. East Bengal aṭanga an laklet David Lalrinmuana'n freekick aṭangin goal ban a pet per a, defender Lalrinzuala Khiangte-in crossbar a pet per bawk. Minute 82-naah S. Malsawmtluanga a rawn inlan a, Mama thiamna lang hman mah se AFC vanduai niah a vannei bik lo.

Keeper chesual!

Mizo goalkeeper ṭha pahnih an inlan a, beisei an phak lo. Aizawl FC goalkeeper Lalawmpuia'n Chanmari defender Lalrosanga ball pet a chhut sual vangin goal ban a per. Hemi hnu hian AwP-a hian halfway line pelh hret

aṭanga Thomas-a freekick pet hnek hman loin injury time-ah ho angreng takin goal a chhuah - AFC defender Lalrozama leh Ramdinsanga te an tihtur an titawk lo bawk.

Chanmari keeper F. Lalmuan­awma a che ṭha bik lo a, box pawna ball khawih vangin referee-in yellow card pek ngeina turah a pe lo. Muanawma hi he mi hnu hian foul dang vangin yellow card pek a ni leh tho a, hremna hmasa pumpelh lo se chuan hnawhchhuah tur a ni.

Thlanga nge nge

Chanmari FC leh Aizawl FC squad khaikhinin coach H. Vanlalthlanga hote an thlanawm lo zawk a, amaherawhchu veteran coach danglamna a lang.

Thlanga hian bench aṭangin Ṭhasiama, Jakob Vanlalhlimpuia leh Joe Zoherliana te a luhtir a, awmzia a nei vek. Ṭhasiama'n chakna goal a khung a, Hnahthial rawlthar lian ṭha Jakob-a luh hnuah an goal nawr a na sawt a, Lengpui rawlthar Joe-a hmangin tlarhnung a phui sawt bawk.

Chanmari FC-in MFA Super Cup-a an match hmasa berah Aizawl FC an hneh lo a, hemi hnu hian I League champion hian player ṭha engemaw zat lalut belh mah se Chanmari-in phuba an la.