Mayweather-a'n glove 'zang' zawk hman a dil

August 26-a Conor McGregor nena inhnek tur Floyd Mayweather chuan 8oz (226 gram) gloves hman dilna Nevada Athletic Commission (NAC) hnenah a thehlut. NAC hi fighter pahnih an inhmachhawn theihna tura phalna petu an nih avangin American boxer hian anni hnenah hian dilna hi a thehlut a ni.

NAC danah chuan 154 pound (69 kg) hnuailam inhnekah reng reng 10oz (283 gram) aia rihna hniam gloves hman phal a ni lo a, Mayweather-a dilna hi August 16-ah ngaihtuah a ni dawn a ni. Gloves zang zawk hman a nih hian an hnek na sawt dawn tihna a ni a, Mayweather hian hnek nat duhin NAC-ah hian dilna a thlen a ni ber.

Kar hmasa khan Mayweather hian, "8oz gloves ka hmang dawn a ni," tiin instagram lamah a lo tarlang tawh a, mahse hetih hunlai hian dilna a la thehlut lo thung. NAC executive director Bob Bennett chuan a hunlai hian, "Kg 154 hnuai lam inhnekah tuman 80z gloves an la bun ngai lo," tiin a lo sawi tawh.

Bennett chuan, "Figh­ter pahnih hian hetiang taka zang gloves hi bun an remti ve ve a nih pawhin keini chuan an sa himna hi kan ngaih pawi­mawh ber chu a ni. Kan dan neihsa ang piahlama kan kal dawn a nih chuan chairman leh com­missioner ten an ngaih­­tuah ṭhat a ṭul ang," a ti.

UFC aṭanga hriat hlawh McGregor hian UFC-ah 40z gloves a hmang ṭhin a, Mayweather-a'n insta­gram lama 80z gloves a hman tur thu a tarlan hian Irish fighter chuan, "Brick ang maia sak hmangin ka rawn deng dawn che nia, lo inring rawh aw," tiin American boxer hi a cho hle.