I League khelh duh club pali an awm
India rama league inelna sang pahniha pakhat zawk I League-ah hmun ruak pahnih a awm dawn a, club paliin season hmasaa Aizawl FC champion-na inelna khelh duhin dilna an thehlut. AIFF hian thla hmasa khan I League khelh duh tan dilna thehluh a nih theih thu an puang.
India FA hian Indian Super League lama an lo tih tawh angin khawpui thlanchhuah bik an nei a, I League khelh duh club-te chu Bengaluru, Mumbai, New Delhi, Ranchi, Jaipur, Jodhpur, Bhopal, Lucknow, Ahmedabad, Malappuram leh Trivandrum-a innghat an ni tur a ni, tiin dil theih a nih thu hi an lo tarlang tawh a ni.
Tute nge?
I League khelh duha dilna thehluttu club-te hi Bangalore khawpuia innghat Ozone FC, Kerala khawpui pakhat Malappuram-a innghat Gokulam FC leh Gujarat leh Rajasthan aṭanga club thar pahnihte an ni a, State pahnih aṭanga dilna thehluttu club thar pahnih hi an hming tarlan a ni lo.
Club pali dilna hi August 18-ah ngaihtuah tur a ni dawn a, League Committee ṭhukhawm chuan an ngaihtuah dawn a ni. AIFF hnuaia league chunga thuneitu League Committee-ah hian MFA honorary secretary Lalnghinglova Hmar chu deputy chairman a ni.
Dinhmun ṭha?
Ozone FC hi 2nd Division I League club an ni a, Bangalore khawpui club Bengaluru FC chu Indian Super League-ah an inlan tawh dawn avangin AIFF chuan he khawpui aṭanga I League khel tur hi an duh nia sawi a ni a, sum ngah Ozone FC hian season tharah I League an khel a nih pawhin a mak lo ang.
Hetihlai hian Gokulam FC hi I League-ah lakluh an nih chuan 2011-12 season-a Chirag United Kerala hnua Kerala state aṭanga I League khel hmasa ber an ni dawn tihna a ni a, Rajasthan leh Gujarat aṭangin I League khel thei club an la awm ngai lo thung.
Engtin zel?
Season hman zawh takah I League club 10 an awm a, Mumbai FC an relegate. Maharashtra club hmunruak luah turin 2nd Division champion NEROCA FC an tling a, Bengaluru FC-in ISL an khelh dawn avangin hmunruak a awm belh. DSK Shivajians chu sum lama an tlakchhiat avangin I League aṭanga inhnuhdawh an tum a, AIFF-in hmunruak pahnih an puan danah Pune club hi season tharah an inlan dawn lo niin a lang.
Tun dinhmunah Aizawl FC, Mohun Bagan, East Bengal, Bengaluru FC, Shillong Lajong, Churchill Brothers, Chennai City, Minerva Punjab leh NEROCA FC chu I League khel tur chiangsa an ni.