Zaninah 'fight' hmuhnawm a awm dawn ; Mizoram Fight League en tur a awm leh dawn ta

Mizoram State Mixed Martial Arts Association leh Zonet ṭangkawpin an buatsaih inelna hi zan dar 8:00-ah ṭan a ni dawn a, R. Dengṭhuama Indoor Stadium, Mualpuiah fight hmuhnawm en turin MMA ngainatu an pungkhawm ang.

MFL zan hmasa berah main card-ah fight hmuhnawm tak tak pasarih en turin a awm a, zaninah bout paruk a awm dawn. Main card ṭan a nih hmain preliminary round-ah fight pahnih en tur a awm dawn a, a hmuhnawm nghal ang. MFL-ah team pali Juggernaut MMA, Promise Strivers, DSZ Fight Club leh BCA Brawlers an awm a, zaninah an fighter-te ṭheuhin an team tana chak lo 'bik' nih an duh dawn lo - a tawi zawnga sawi chuan, zanin fight awm tur hi a hmuhnawm dawn tihna a ni.

Dinhmun ṭha DSZ

DSZ Fight Club-in MFL zan hmasa berah bout hnih chauh an nei chungin an fighter pahnih technical knockout hmanga an chak ve ve avangin point 20 ngawt an hmu a, hmahruaitu an ni, zaninah bout ngaah an fighter-te an inlan leh dawn bawk si avangin DSZ tan hmahruai zelna hun a ṭha hle - an bawhpelh chuan puh tur dang an awm lo ang.

Jaggernaut MMA-in zan hmasa bera an chet ṭhat loh rah an la 'seng' zel dawn niin a lang - zan hmasa berah fight panga nei chungin point 13 chauh an hlawh chhuak thei a, zaninah bout khat bak an chang dawn lo - DSZ umpha turin chance a awm lo tlukah ngaih theih a ni.

Strivers tan thawhrim rah?

Promise Strivers hi thaibo ngawt an harsa hle. MFL zan hmasa berah fight pali hma­chhawn chungin point 12 an hlawh chhuak a, zaninah bout thum an nei dawn - an fight pahnihah DSZ an hmachhawn dawn avangin hmahruaitu team point chhuhsakna remchang a ni a, an fighter ten bawh­pelh loh an duh ang.

BCA Brawlers-in zan hma­sa berah fight pathum hmachhawna point thum chauh an neih theih avangin dah san an harsa a, zanina bout thum an neiha inlan tur zinga mi Ngursaimawia erawh a team vawrh sang thei tur khawpa theihna nei a ni.

Taekwondo vs Kickboxing?

Zanina bout paruk zingah ban­­tamweight-a DSZ fighter Lal­ramdinthara leh BCA fachuam David Zairemthanga inhmachhawn tur hi mipui hmuh chak a ni, MMA ngainatute mit a tlai leh dawn. Thenzawl tlangval Rd-a hi Taekwondo-ah Mizoram Champion of the Champions lo ni tawh a ni a, national level-ah bronze medal a dawng tawh bawk - a sulhnu ropui hi inchhuan nan a hmang a nih erawh chuan a chesual ang.

Rd-a hmaa ding tur David hi Kickboxing lama sulhnu nei ṭha a ni tlat. Zemabawk tlang­val hian National Kickboxing Championship-ah hial gold medal a lo awrh tawh a, Ram­dinthara hmaa zam tur a ni lo.

Saimawia a mawi dawn?

Mizorama Muaythai in­fiam­na ngainatu zingah Ngur­saimawia hi hming thar a ni tawh lo. Luangmual tlangval hian international level thlengin Muaythai-ah a theihna a lo pholang tawh a, MMA-ah zuihral a duh lo tawp ang. Flyweight-a a hmachhawn tur Mission Veng tlangval Lalropuia Hnamte erawh MMA aṭanga bul ṭantu a ni a, ring chhungah 'senior' zawk a nihna pholan a duh dawn.

Flyweight-a inhmachhawn tur Lalruatkima leh Lalbiak­sanga ten 'Hneh lohna chhan tur ka hre lo' ti ve ve chungin an incho a, bantamweight-ah boxing aṭanga MMA luh­chilh Lalnunsiama leh Lalthanpuia'n in hlauhna chhan tur an neih an hre lo a, flyweight-ah Lalpiangthara leh Lalrotlinga ten 'chak lo zawk ka ni dawn lo' an ti ve ve a, hmeichhe bout awmchhuna inhmachhawn tur K. Lalrinpuii leh Lalhmingtluangi-ten in hlah khem an tum lo.