Premier League kan nghak chhuak Arsenal mikhual tur Leicester City

Zanin dar 12:15 hian tun season Premier League match hmasa ber chu Emirates Stadium, London-ah khelh a ni dawn. Arsene Wenger leh a nauten Lei­cester City an mikhual ang. Arsenal tan Alexis Sanchez a inlan dawn lo a, an player man to ber Alexandre Lacazette erawh inkhel bul ṭan tura ngaih a ni thung.

Arsenal manager Wenger-a'n kum hnih daih contract a ziah bul a ṭan dawn a, hetih lai hian a player duhlai San­chez, Mesut Ozil, Alex Oxlade-Chamberlain leh Jack Wilshere te erawhin an contract neih lai tawpna tur season bul an

ṭan dawn thung - season hmasa Premier League pangana Wen­ger tan match hmasa ber aṭangin chet sual a thiang dawn lo.

Leicester City manager Craig Shakespeare-a'n a vawi khat nan a naute season bul a ṭan pui dawn a, nipui transfer chhunga chhuak tura ngaih winger Riyad Mahrez chuan training ṭha taka a zawm avangin Foxes tana league nomawi chawi tawhtu hian Arsenal a hmachhawn ngei tura ngaih a ni.

Beiseina

Arsenal hian tun hnai season li chhung chu Premier League an match hmasa berah ṭum thum an tlawm a, record duhawm lo tak a ni. Community Shield an chawi hnuah Wenger-a'n ṭha taka season bul an ṭan theih a beisei thu a sawi, chutihrualin a player zingah match fitness nei ṭha tawk lote chu chhawr luih a tum loh thu a sawi bawk.

Gunners player zingah Com­munity Shield khel thei lo midfielder Aaron Ramsey leh Mesut Ozil te dinhmun a chiang lo, anni pahnih bakah hian Chelsea an hmachhawn ṭuma inhliam vanga lakchhuah captain Per Mertesacker te chu Leicester hmaah an inlan dawn leh dawn loh sawi chian theih a ni rih lo.

Tlarhnungah rinrawl Lau­rent Koscielny chu hrem vangin a inlan thei dawn lo a, defender thar Sead Kolasinac erawh season bul ṭan turin a inpeih thung - Schalke player hlui hian Blues lakah tharum a ngah zia a lantir tawh.

Kum 67 mi Wenger chuan, "Ka naute zingah Ramsey, Ozil leh Mertesacker te dinhmun sawi thiam a har a, player ṭhenkhat chu chawlh an hman hnuah an la inkhel leh lo bawk. Kan squad a chhah aavngin player khel tur thlan chungchangah harsatna awm dawn lo a, inbuatsaihna kan neih ṭhat tawh avangin inelna hmachhawn turin kan inpeih tawh," tiin a sawi.

North London club hian an striker neih sa Olivier Giroud an duh tawk loh avangin Lyon aṭangin Lacazette an lalut. Tun dinhmunah chuan season hmasa Ligue 1-a goal 28 khung thei Lacazette hi Wenger-a'n a ring zawk niin a lang, pre season leh Community Shield-ah inkhel bul a ṭantir avangin Foxes lakah pawh bul ṭan ngei tura ngaih a ni.

Mahrez khel dawn?

Kum 2015-16 season khan beisei loh tak maiin Lei­cester City chuan Premier League nomawi an chawi a, hlawhtlinna an chan theih nana player pawimawh ber pakhat chu Riyad Mahrez a ni. Algeria international hian tun hnaiah club chhuahsan a dil. Mahse, amah lalut duhtu AS Roma leh Foxes lam an la inrem theih mai loh avangin pre season-ah pawh a club tan a inlan zel rih.

Foxes manager Shakespeare chuan, "Mahrez hi mi puitling tak a ni a, tun thlengin harsatna min siamsak lo. Training ṭha takin a nei a, club dangin min chhuhsak hma chuan kan team tana khel tura thlan theih loh a nihna chhan tur a awm lo," tiin a sawi. Shakespeare hian a player duhlai hian a thutlukna suta Foxes tana khelh zel a duh a nih pawhin an pawm reng thu a sawi tawh bawk.

Leicester City tan hian season hmasa lama an player pawimawh Danny Drinkwater chu a malpui na vangin a khel thei dawn rih lo. Sevilla aṭanga pound maktaduai 15 zeta an lakluh Vicente Iborra pawh a ṭhâl na vangin a la inlan thei lo ang.

Premier League champion lai Chelsea manager Antonio Conte cuan Community Shield-a Arsenal an hneh loh hnuah, "Premier League-ah hian champion thei tem paruk an awm, Arsenal kha an player ṭha ṭhenkhat tel loin kan hneh loh tih hriat reng a ṭha a, anni kha season hmasa pa­ngana an ni," tiin a sawi. Italian manager sawi ang hian Chelsea, Manchester United, Manchester City, Liver­pool, Tottenham leh Arsenal te hi champion tum ngam vek an ni - season dang zawng aiin kumin Premier League hi a hmunawm zawk a nih pawhin a mak lo ang.