Murray a la dam thei lo

World number 1 Andy Murray chu a khel bawr (hip) na vangin a la inkhel thei lo zel. Britain tlangval hi tunkar chhunga khelh tur Rogers Cup-ah a inlan theih loh hnuah karleha neih tur Cincinnati Masters lamah pawh a inkhel thei lo zui dawn.

Kum 30 mi Murray hi world ranking-ah pawh a dinhmun a him lo hle a, Rogers Cup lamah number 2 Rafael Nadal-a'n semifinal a thleng thei a nih chuan number 1 nihna a chhuhsak ang. Murray hi kumina Grand Slam hnuhnung ber US Open-ah pawh a inlan thei dawn em tih a chiang ta lo.

Grand Slam vawi thum champion tawh Murray chuan, "Ngaiawh turin ka inbuatsaih mek a, Cincinnati-ah pawh ka inlan thei rih lo ang. New York-ah inkhelh ngei ka duh a, chumi ti hlawhtling tur chuan indim ka la ngai hle a ni," a ti. Kumin US Open hi August 28 aṭanga September 10 thleng khelh tur a ni ang.

July thlaa khelh zawh tak Wimbledon-ah khan Murray hi American Sam Querrey hneh loin a tla a, tun season hard court inelnaah a la inlan miah lo a ni.