Nadal leh Federer chak nuamsa

US Open inbuatsaihna pakhat ATP Montreal Masters khelh mekah Rafael Nadal leh Roger Federer te chuan harsatna nei loin an match hmasa berah hnehna an chang.

Nilaini zan inkhelah seeded pakhatna Nadal hian Borna Coric chu 6-1, 6-2 in a sawp. Spain tlangval hian hnehna chang turin darkar khat leh minute 11 bak a mamawh lo a, a khingpui hian break point vawi hnih hmu ve mah se a service a hloh lo. Vawi thum champion tawh Nadal hian Denis Shapovalov a hmachhawn leh ang.

Inkhel pakhat zawkah kum 36 tling hlim Federer chuan minute 53 chhung lekin world number 116 Peter Polansky chu 6-2, 6-1 in a sawp ve bawk. Swiss star Federer hian kuminah match 32 hnehna a channa chiah a ni a, a match lehpekah chuan David Ferrer nen an inkhel ve leh dawn a ni.

Inkhel dangah seeded parukna Milos Raonic chuan Adrian Mannarino 6-4, 6-4 in a hneh. Canadian tlangval hian hnehna a chang chho zel a nih chuan semifinal-ah Nadal nen an intawng ang.

Gael Monfils-a'n Kei Nishikori lakah match point vawi li ngawt a hmuh tawh chu pawtthla lehin 6-7 (4-7), 7-5, 7-6 (8-6) in hnehna a chang a, Alexander Zverev pawhin inkhel inhnehtawk takah Richard Gasquet chu 6-3, 4-6, 7-6 (7-3) in a hneh ve bawk.