Indian shuttler-te hmabak a harsa dawn lo?

Badminton World Champion­ship chu August 21 aṭangin khelh ṭan a ni dawn a, Scotland khawpuia inelna neih turah Indian shuttler langsar PV Sindhu, Saina Nehwal leh Kidambi Srikanth te chuan quarterfinal hma chuan player langsar an hmachhawn dawn lo niin a lang.

World Championship-a bronze medal vawi hnih dawng tawh Sindhu hi first round-ah a bye dawn. Rio Olympic silver medalist hian a match hmasa berah tun hma lama vawi thum a hneh tawh Kim Hyo Min a hmachhawn ang, an sulhnu en chuan harsa lutuk loa chak tura ngaih a ni.

Kum 22 mu Sindhu chuan, "A lan dan mai chuan kan hmabak hi a harsa lutuk dawnin a hriat loh. Mahse, World Championship a nih tawh chuan a inlan phak chin chu player ṭha tak tak vek an ni a, result hi sawi lawk ngawt theih a ni lo," tiin a sawi.

Season hmasa World Cham­pionship-a final thleng thei Saina pawhin second round aṭangin bul a ṭan dawn a, world number 1 hlui hian hnehna a chang chho zel a nih chuan quarterfinal-ah Korean nula Ji Hyun Sung a hmachhawn a ngai dawn. Tun hmain vawi kua an inhmachhawn tawh a, India nula Saina hian vawi hnih chiah chak ni hmel a hmu ve a ni - final lut turin a kawng a awlsam dawn lo.

India mipa shuttler zinga seeded sang ber Srikanth-a'n a match hmasa berah Russian Sergey Sirant a tum dawn a, final lut tur chuan quarterfinal-ah world number 1 ni lai Son Wan Ho a hneh a ngai dawn.

Kum 24 mi Srikanth chuan, "Quarterfinal hma chuan khawvela player langsar zual ka hmachhanwn dawn loh avangin draw ṭha tak niin ka hria. Chutih rualin hlawhtling tur erawh chuan thawhrim a ngai dawn a, a tir aṭanga a tawp thlengin tha thlah a thiang lo ang," tiin a sawi.