Garbine Muguruza-i'n last 16 a lut
Nilaini zan khan Wimbledon champion Garbine Muguruza chuan Kirsten Flipkens chu 7-5, 6-2 a hnehin Rogers Cup last 16 a lut. Kumin Canadian hardcourt tournament-ah hian hmeichhe player an tel ṭha hle a, world ranking-a a sang 10 zinga pariat ngawt an inlan.
World number 4 Muguruza hian a tir aṭangin inkhel a thunun a, hnehna chang tur hian darkar khat leh minute 25 bak a mamawh lo. Quarterfinal lut tur chuan kum 21 mi Ashleigh Barty a paltlang leh a ngai dawn a ni.
Spain nula Muguruza chuan, "Set khatnaah tihsual ka ngah hle a, set hnuhnung zawkah erawh zawi muanga insiamṭhain hma pawh ka sawn hle," tiin duhthusama bul a ṭan bik loh thu a sawi.
World number 1 a nih hnuah Karolina Pliskova chuan a match hmasa ber khelin Russian nula Anastasia Pavlyuchenkova chu 6-3, 6-3 in a hneh. Kum 25 mi Pliskova hi Wimbledon second round-a a chak loh hnua a inkhelh lehna hmasa ber a ni.
Inkhel dangah American rawlthar Catherine Bellis chuan a khelh ṭhat a chhawmnung zel. Bellis hian third round lut turin seeded pariatna Svetlana Kuznetsova chu 6-4, 7-5 in a hneh.
US Open inbuatsaihna Rogers Cup inkhel dangah Britain nula Johanna Konta-i'n match point vawi hnih a hmuh a chhawr ṭangkai thei lo a, a hun ṭha neih a hman ṭangkai theih loh miau avangin player langsar ni lem lo Ekaterina Makarova lakah 5-7, 7-6 (7-4), 6-3 in a tlawm.
Hmeichhe player langsar dang zingah Wimbledon finalist Venus Williams, world number 1 hlui Angelique Kerber leh world number 2 Simona Halep te pawhin harsatna nei loin hnehna an chang vek bawk a ni.