BVT-in Chhinga Veng dang zo lo
Great Sports I Day Football-ah Chhinga Veng FC-in nimin khan Bethlehem Vengthlang FC 2-1 a hnehin final an thleng.
Independence Day (August 15)-ah Chhingcows hian I League champion Aizawl FC hnehtu Chanmari FC nen nomawi an inchuh ang.
Ruahsur hnuaia Lammuala inkhelah Chhinga Veng tana R. Malsawmtluanga goal chu BVT-in Ramengmawia hmangin sut mah se, Chhingcows striker Malsawmfela chakna goal a khung.
Ruah sur nasa hle mah se football tuipui veng pahnihin fans an nei chhe lo.
Nuam nuam nuam!
Chhinga Veng mipuiin MFA Super Cup an champion vanga 'nuam nuam nuam' tiha Lammuala tual an chai hnuah an ban phakah I Day Football nomawi a awm leh ta.
Nimin inkhelah player ṭha danglamna a lang a, MFA Super Cup final-a goal ropui khungtu MS-a'n a class san zia first half-ah pholang. Chhinga Veng midfielder MS-a hian Laldampuia siamsak chu box pawn aṭangin goal kilah a pet lut a, keeper Lalruatpuia tan chet hman ngaihna a awm lo.
BVT-in in an siphurh sut theih nan striker thar PC Lallawmkima'n ball tauh chu Chhingcows keeper Zothanmawia'n man nghet zo loin awmna hmun fuh Ramenga'n si phurh sutna goal a khung.
Ruahsur leh chhum zing vangin inkhel chawlh fo a ngai a, team pahnihin an ṭhat dan ber an lantir thei lo a, an inhnehtawk bawk. Minute 63-naah Sawmfela'n a thiam lantirin nalh takin a vir pui a, chakna goal a khung - I Day Football match nga a khelh tawhah goal khung vekin goal ruk a khung tawh a, top scorer a ni mek.
Vanduai nawn
Bethlehem Vengthlang FC coach Chawngthansanga'n MFA Super Cup quarterfinal-ah Chhingcows 0-1 in an hneh lo a, hemi hnu hian residential camp te neiin an thawkrim hle.
Nimin inkhelah an intawn hmasak ṭum ang thoin BVT-in Chhingcows bei tawk mah se ,minute 90 chhunga goal khung tlem zawk an ni a, a vawi hnih nan an vanduai.
Sanga hmaah nomawi
Chhinga Veng coach Lalsangzuala Hmar-in I Day Football nomawi chu la chawi ngai loh avangin season khata nomawi pathum lak theih zingah a la châk ber a nih thu Vanglaini a hrilh tawh. Tunah chuan Sanga duhthusam thleng tur dang thei chu H. Vanlalthlanga enkawl Chanmari FC chiah an ni ta.
Chhingcows hian group stage-ah Chanmari FC hi 5-1 in an sawp tawh a, he inkhel aṭanga thlir chuan Sanga duhthusam hi a thlen theih a rinawm ta hle. Chhinga Veng hian Sanga hnuaia match 11 an khelh tawhah an la chak vek a, goal 69 an khung tawh a, an record ṭha tak hi final-a tawp tir an duh lo ang.
I Day Football Thlirna Tawi
Semi Finals
August 10, Ningani - Lammual
Aizawl FC 1 - 2 Chanmari FC
AFC : Rochharzela 17'
CFC : Thomas Lalengkima 90+4'; Thasiama 103'
Nimin Inkhel Results - Lammual
Chhinga Veng FC 2 - 1 Bethlehem Vengthlang FC
CVFC : R. Malsawmtluanga 16'; Malsawmfela 63'
BVT : Ramengmawia 53'
Final - August 15, Thawhlehni
Chanmari FC Vs Chhinga Veng FC