Coutinho a chhuak dawn lo - Liverpool

Barcelona-in pound mak­taduai 90-a lakluh tumin dawr mah se Liverpool chuan an midfielder Philippe Coutinho chhuahtir an tum loh thu an sawi - Brazilian forward hi Barcelona chuan vawi hnih an dawr hlawhchham tawh a, Reds-in an dinna an sawh sawn lo.

Liverpool neitu Fenway Sports Group chuan, "Liverpool chuan Philippe lakluh tuma dawrna reng reng kan dawng­sawng dawn lo. Nipui transfer bazar tawp hun thleng pawhin Coutinho hi kan player a ni zel dawn a ni," tiin thuchhuah an siam a, Reds fan-te hahdamin an awm thei ta.

100%

Barcelona hian July khan pound maktaduai 72-in Coutinho hi lakluh tumin an dawr tawh a, Reds manager Jurgen Klopp-a'n, "Mahni player neih ṭhat hralh chi kan ni lo," tia chhangin Catalan club dawrna hi a lo hnawl tawh. Barca-in pound maktaduai 90-in an dawr nawn a, club neitute meuhin thuchhuah an siam ta.

Liverpool boss Klopp chuan, "FSG-in hetianga thuchhuah an siam tawh a nih chuan 100%-in Coutinho hi a chhuak dawn lo tih a chiang a ni. Nangni pawhin kha thu chhuak kha in chhiar thiam ve vek ang chu," tiin press conference-ah media ho a hrilh - Coutinho a chhuak dawn lo.

Mahse...

Liverpool-in tun season-a an league match hmasa ber khel turin vawiin tlai dar 5:00 hian Watford an lenchilh dawn a, hliam vangin Coutinho a inlan thei dawn lo. Reds manager Klopp chuan, "Philippe hian kar hmasa Zirtawpni aṭang tawh khan a hnung na avangin training a zawm thei lo a, a inlan thei dawn lo," a ti.

Reds hian August 15 zanah Champions League playoff khel turin Hoffenheim an lenchilh dawn bawk a, he hunah pawh hian Coutinho a inlan theih dawn leh dawn loh a chiang lo. Reds tan Daniel Sturridge chuan Watford a hmachhawn thei dawn lo chiang bawk a, season hmasa tluan deuhthaw a inhliam Danny Ings erawh a dam chiang tawh thung.

Plan A

Liverpool-in nipui transfer-ah Mohamed Salah, Dominic Solanke leh Andrew Robertson an lalut tawh a, Klopp chuan an player duh tak vek an lakluh thu a sawi. German coach chuan, "Players kan lei chuan kan team-a khel tura kan duh vanga lalut kan ni mai. Plan B, C leh D tih vel kan nei ve lo a, kan lakluhte hi Plan A vek an ni," tiin a duhzawng hlir a lei thu a sawi.

Reds manager chuan sawi chhunzawmin, "Team kan neih ṭhat theih dan ber neih kan duh a, chumi awmzia chu kan players neih ṭhat sate pawh chelh a ni. Liverpool hian inhralh kan mamawh lo a, eng ang zata tam pawn kan player duh mah se kan duhlai an nih chuan kan hralh lo ang. Sumah kan buai lo," tiin sum mamawh vanga players hralh chi an nih loh thu a sawi nghal.

Buaina dang

Liverpool-in Philippe Cou­tinho an hralh loh tur thu an ziah hnuah Brazilian midfielder hian club hnenah chhuah dilna a thehlut. Heta ṭanga lang chiang tak chu Coutinho hian English club Reds aiin Spanish club lian Barcelona tana khelh a duh zawk tihna a ni.

Brazilian midfielder contract ziah hnuhnun berah 'release clause' a awm lo a, hei vang hian Reds boss Klopp hian a player duh lai hi a chelh thei a, amaherawhchu Kop-in Coutinho hi an ngaihdam theih a rinawm lo a. German boss tan pawh club tan khel duh loh chhawr a harsa ang.

Brazil captain Neymar-a'n Catalan club chhuahsana PSG a zawm chhan chu 'release clause' a neih vang ni tho mah se chhuah a duh vang a ni a, hei vang hian chhuah duh Coutinho hmalam hun a chiang tawh lo.