Juve ropuina Cristiano Ronaldo

Cristiano Ronaldo chu European league lian - Serie A, La Liga leh Premier League huanga goal 50 khung tling vek thei hmasa ber a ni. Portuguese forward hian Old Lady chu Lazio lakah 2-1 in hnehna a chanpui.

Juve hian anmahni hnaih bertu Inter Milan lakah point riatin hma an hruai fal ta. A zawna league nomawi vawi kua chawi turin point li chauh an mamawh tawh, khelh hmabak pali an la neih avangin nomawi chu a him tia sawi ngam a ni ta.

Thawhṭannni zan Allianz Stadium-a inkhel hi Serie A match pawimawh berte zinga mi a ni. Team pahnih an fimkhur a, an inven tawn avangin hun chanve hma lamah goal a lut lo, second half-ah erawh boruak a sang. Minute 51-ah Ronaldo goal shot-in Lazio defender Jacinto Quissanga ban a per avangin penalty an chawi, harsatna nei loin a hlawhchhuaktu hian a khung. Lazio an insiamrem hman lo, goal luh aṭanga minute thum lekah Ronaldo bawkin an goal hnihna a khung zui.

Lazio defender Ramos Marchi-a'n halfway-line bulah ball a hloh a, forward Paulo Dybala chuan laksakin chak takin a tlanpui zui. Argentina international hian Laizo goal bul thlengin a khalh, keeper Thomas Strakosha chauh a hmachhawn hnuah Ronaldo khung turin a pe, a goal chiang.

Ronaldo-a'n hattrick siam theihna hun ṭha nei mah se goal bar a tauh per dawp. Hun tawp dawnah Leonardo Bonucci-a'n box chhungah Ciro Immobile a ti tlu a, penalty a chawi; Immobile-a'n a khung zui. Milinkovic-Savic-a'n si phurh sut zawh theihna hun nei mah se a freekick ṭha tak chu Wojciech Szczesny-a'n a dang.

Juventus tan nomawi a hnai a, an khelh hmabak tur ngaihtuahin point li hmuh chhuah chu harsa vak lo tura ngaih a ni. Turin club hian Udinese, Sampdoria, Cagliari leh AS Roma an la tum dawn. Team khauh ber tura ngaih Roma an hmachhawn hmain an dinhmun a chian a rinawm.

Old Lady manager Maurizio Sarri chuan, "Ni ruk chhungin match thum kan khelh a ngai dawn, engkim mai hi kan kuta innghat tawh ni mah se a awlsam dawn lo. Taksa chauh ni loin rilru pawh a paukhauh a ngai dawn," tiin a sawi.

Chak lo mah se Lazio manager Simone Inzaghi a vui lo. Italian manager chuan, "Inkharkhip hnu lamah harsatna hrang hrang kan tawk nual, team dangte angin kan squad a chhah tawk lo, chuti chung chuang inhnaih tak takin match khelh a ngai si," tiin Covid-19 chu an kaltluang lai titawptu niah a ngai.

Season tir lamah Inter Milan an kal fal a, season laihawlah Lazio an che fuh. Coronavirus vanga an chawlh hma khan Laizo leh Juve inthlauhna chu point khat chauh a ni, tunah erawh an tan Juve nomawi chawi lai chu hreh tak chunga en a ngai dawn.

Player ṭha an awm a, a ṭha bik pawh an awm. A ṭha fal bik erawh tlemte chauh an ni - chung zinga mi chu Cristiano Ronaldo a ni. A kalna hmun apiangah sulhnu ropui a hnutchhiah zel. Kum 35 mi ni tawh mah se Ronaldo tha za a la reh lo, season kal laiah Serie A goal 30 a khung tawh; Lazio forward Ciro Immobile nen an khung zat a inang, golden boot dawng tur zawk chu chinfel a la ni lo.

Real Madrid forward hlui hian Serie A goal 51 a khung ta a, goal 50 khung tling tur hian match 61 chauh a la khel - hetiang dinhmun thleng tura match mamawh tlem ber a ni hial. Season kal laiah pawh a khung belh ngei a rinawm.

Ronaldo chuan, "Mimal hmingṭhatna hi a pawimawh, chutihrualin chu aia pawimawh zawk chu team-in hnehna kan chang hi a ni. Team ṭha tak tan ka khel a, chanchin lawmawm lamin min zui hi a hlimawm lai chu a ni," a ti.

•    Manchester United tan Premier League match 196 a 

khelh aṭangin goal 84 a khung.

•    Real Madrid tan La Liga match 292 a khelh aṭangin 

goal 311 a khung.

•    Juventus tan Serie A match 61 a khelh aṭangin goal 51 

a khung.