Mittui nen Usain Bolt a liam

Intlansiak khawvela hming dai ngai tawh lo tur Usain Bolt chuan Inrinni zan khan intlansiak track chunga a hun hnuhnung a hmang a, Jamaican sprin­ter ropui hi malpui hliam vangin a tlan tluan thei lo.

London Stadium-a World Championship mipa 4x100m relay intlan­siakah Jamaica team tan Bolt hi a hnuhnung berah a tlan a, a teammate Yohan Blake hnen aṭanga baton (team intlansiak ten an inpek chhawn ṭhin) a lak lai chuan an ram team hi pathumna an ni mek.

Tun hma ang chu nise Bolt tan a hmaa mi pahnihte lehpela pakhatna nih chu thil huphurhawm tak niin a lang hran lo, mahse 50m vel tlan hmabak an la neih laiin Bolt hi a malpui veilam a hliam a - gold medal a beiseina a thamral zui.

Mipa 4x100m relay in­tlansiakah hian a thlengtu Britain team chuan se­cond 37.47 chhunga thlengin pakhatna an ni a, an hnungah hian United States (37.52 seconds) leh Japan (38.04 seconds) te an thleng bawk.

Kum 30 mi Bolt hian tun hnai Olympic hnu­hnung pathum Beijing, London leh Olympic-ah te khan 100m, 200m leh 4x100m relay-ah te gold medal a hui fai vek. Gold medal a dawn pakua zinga pakhat erawh a teammate zingah dan bawhchhia a lo awm avangin lak kir sak a ni.

Feet 6 leh inches 5 zeta sang Bolt hian World Championship-ah gold medal 11 teh meuh a hlawh chhuak hman a, duh­thusama ṭhain a hun hnuhnung hmang thei lo mah se a vanglaia a sul­hnu hnutchhiah hi engti kawng mahin sawi nep theih a ni tawh ngai lo ang.

Hun hnuhnung
Mipa intlansiak 100m leh 200m world record chelhtu Bolt-a'n World Championship hi a tan inelna hnuhnung a nih tur thu a tichiang tawh a, kuminah hian gold medal pahnih dawn beiseiin London a pan.

Mahse, Bolt hian a duhthusam ang thil a hmu thei lo. A ropuina ṭhin 100m bikah bronze a la a, a inlanna pakhat zawkah hliam vangin a beiseina a tham ral zui bawk. Bolt-a teammate Yohan Blake chuan 4x100m relay an tlan dawna hun an pawt khawtlai chu an vanduai phah niin a sawi.

Blake chuan, "Room-ah min khung rei lutuk. Warm up kan nei a, kan nghak leh a, chutah warm up kan nei nawn leh a ka nghak leh," a ti. Blake chuan sawi zawmin, "Intlan­siak kan neih hma khan Usain khan minute 40 leh medal hlanna vawi hnih kan nghah phawt a ngai chu mak a tih thu min hrilh hman," a ti. Blake hian a teammate chuan vawt a tih hman thu leh hliam a tawrh chhan chu intlansiak an tihkhawtlai nasat vang niin a sawi.