Champion lai huaisen takin chak lo

Premier League champion Chelsea-in mang chhia nen season bul an ṭan. Blues hian Stam­ford Bridge-ah season liam taa khualmuala vawi khat chauh chak Burnley lakah 2-3 in an chak lo.

Inrinni zan inkhelah captain Gary Cahill chu minute 14-na lekah hnawhchhuah a ni a, hemi hnu hian Burnley tan Sam Vokes-a'n goal hnih a khung bakah Stephen Ward-a'n goal khat a khung ve bawk. First half a zawh chuan mikhual team hian league champion lai lakah 3-0 in hma an hruai der tawh.

Minute 59-naah Alvaro Mora­ta a rawn lut a, Spanish striker hian minute 10 hnuah Chelsea tana a goal hmasa bera a khung nghal. Blues vanduaina belhchhaha awmin minute 81-naah Cesc Fabregas chu hnawhchhuah a ni a, player pakuaa an khelh hnuah Antonio Conte hoten beidawng loin an la nawr ngam.

Chelsea-in an huaisen rah sengin Morata tauh per chu David Luiz-a'n a pet goal a, player pahniha tlem chungin hun tawp thlengin nawr zui mah se goal dang hmuh tur a awm tawh lo. Pre season-a beisei pha lo Morata-a'n a class san zia a pholang a, Real Madrid aṭanga London club zawmtu hian inkhel bul a ṭan thuai ang.

Blues-in champion thinlung nei mah se champion player an nei tam tawk lo. Inhmuh thiam loh vangin Diego Costa tan hmun a awm tawh lo a, Eden Hazard leh Pedro te an inhliam a, Cahill leh Fabregas te hnawhchhuah an ni. Antonio Conte-a'n de­fen­der pahnih Nathan Ake (Bournemouth) leh Kurt Zouma (Stoke - loan) a chhuahtir bawk a, an squad a chhah tawk lo.

Chelsea boss Antonio Conte chuan inkhel danglamna chu Cahill a hnawhchhuah vang a nih thu a sawi a, kum 1998 hnua Premier League ṭan nia an chak lohna hmasa ber a ni.

Blues hian August 20, Pa­thianni hian Wembley Stadium-ah Tottenham Hotspur an lenchhilh dawn a, an hmabak a khirh nghal hle.