Mit titlai Mizoram Fight League

Zirtawpni zanah ruah sur mah se Mizoram Fight League zan hnihna en tura R. Deng-

ṭhuama Hall, Mualpui panna kawng a dal zo lo - Zonet leh MISMA buatsaih inelna hi a hmunah mipui ṭhahnem takin an en a, beisei lawk ang ngeiin fight a hmuhnawm bawk.

DSZ fighter-ten hnehna an chan zawh loh vek laiin Pro­mise strivers fighter pahnihin technical knockout hmangin an khingpui an hneh a, pakhatin unanimous decision hmanga point thum hlawh chhuak bawkin Promise Strivers chu hmahruaitu thar an ni.

Ngura a dingchang

Mipui ngaihven leh hmuh chak main event-ah BCA fighter Ngursaimawia'n a theihna pholangin Lalropuia Hnamte chu unanimous decision-in a hneh - round hmasa berah Mission Veng tlangval Ropuia'n Ngura hnar a hnek thi avangin Luangmual tlangval a talbuai hman a, mah se a tlu rei lo.

Ngursaimawia'n a ke hman thiamna chhawr ṭangkaiin Ropuia a bei let a, hun a tawp meuh chuan flyweight fight hmuhnawm takah hian Ngura a dingchang zawk.

Zairemthanga a 'zai'

Bantamweight-a David Zai­rem­thanga leh Lalram­dinthara inhmachhawn turin sawi a hlawh a, a tawpa hnehna hlado chhamtu chu Zairemthanga a ni. Zemabawk tlangval hian taekwondo player Ramdina hmaah a 'ke' a hmang thiam zawk tih a pholang a, chutihrualin Thenzawl fighter huaisen Ramdina 'fight' chu mit ti tlaitu a ni - hun a tawp a, chak tur zawk rinthiam harsa tak karah split decision-in David-a chu chak zawkah puan a ni.

Zirtawpni zana hmeichhe fight awmchhunah technical knockout kan hmu thung a, Promise Striver tana inlan Edenthar nula K. Lalrinpuii chuan harsatna nei loin DSZ hmachhuan Zemabawk nula Lalhmingmawii a hneh.

Fight dang

Flyweight match-a Tuikual North tlangval Lalbiaksanga leh Falkland tlangval Lalruatkima inhmachhawn an fimkhur dun a, split decision hmangin BCA Brawlers tana inlan Lalbiaksanga hian DSZ fighter Ruatkima hi a hneh.

Bantamweight-a Promise Striver fighter Lalnunsiama leh DSZ fighter Lalthanpuia inhmachhawnah Nunsiama a chungnung tluan chhuak zak a, unanimous decision-in hnehna a chang.

Flyweight bout-ah Promise Striver fighter Lalrotlinga'n Juggernaut MMA fighter Lal­­piangthara chu technical knock­out hmangin a hneh bawk.

Mizoram Fight League zan hnihna results
PRELIMINARY ROUND :
FLYWEIGHT
1. Jeho Malsawmpuia (Zuangtui) def. Lalremruata (Sairang) [RNC, Round 1]
MIDDLEWEIGHT
2. Lallawmawma (Chanmari) def. Jonathan Lalhruaitluanga (Electric Veng) [Unanimous Decision]
MAIN CARD
FLYWEIGHT
3. Promise striver v DSZ
K. Lalrinpuii (Edenthar) def. Lalhmingmawii (Zemabawk) (TKO, Round 3, 33 sec)
FLYWEIGHT
4. Promise Striver v Juggernaut MMA
Lalrotlinga ( New Ngharchhip) def. Lalpiangthara (Siaha) [TKO, Round 3, 1:20]
BANTAMWEIGHT
5. Promise Strivers v DSZ
Lalnunsiama (Lunglei Rahsi Veng) def. Lalthanpuia (East Phaileng) [Unanimous Decision]
FLYWEIGHT
6. BCA Brawlers v DSZ
Lalbiaksanga (Tuikual North) def. Lalruatkima (Falkland) [Split Decision]
BANTAMWEIGHT-
7. BCA Brawlers v DSZ
David Zairemthanga (Zemabawk) def. Lalramdinthara (Thenzawl) [Split Decision]
FLYWEIGHT
8. BCA Brawlers v DSZ
Ngursaimawia (Luangmual) def. Lalropuia Hnamte (Mission Veng) [Unanimous Decision]
Team Dinhmun
Hming Pld Pts
Promise Strivers 7 35
DSZ Fight Club 7 20
Jaggernaut MMA 6 13
BCA Brawlers 6 10