Super sub Ramsey leh Giroud

Substitute bench aṭanga tlan lut Aaron Ramsey leh Olivier Giroud te goal hmangin Arsenal chuan an mikhual Leicester City an lehthal a, season thar Premier League match hmasa berah Arsene Wenger-a nauten Foxes 4-3 in an hneh.

Zirtawpni zan Emirates Sta­dium-a inkhelah Gunners striker thar Alexandre Lacazette-a'n ṭan aṭanga second 94-na lekah goal hmahruai tauh lutin a team hma a hruaipui. Gunners fan-te lawm chhung a rei lo, minute hnih a liam hnuah forward Shinji Okazaki chuan a lu hmang bawk­in an si phurh a sut nghal.

Mikhual tlangnel Leicester tana Jamie Vardy goal khung chu Danny Welbeck-a'n sut ve leh mahse season hmasa nipui transfer laia Arsenal hnartu Vardy hian goal dang a tauh lut leh - minute sarih chauh khelh tur a awm tihin Foxes hian 3-2 in hma an hruai.

Gunners manager Wenger-a'n season bul ṭan ṭhat loh a pawizia a hre chiang. Goal khung belh tumin Ramsey, Giroud leh Theo Walcott te a luhtir a, a tisual lo. Midfielder Granit Xhaka pass chu Ramsey-a'n chiang zeta a khung hnu lawkah Swiss international corner pet chu Giroud-a'n chakna goal ni turin a tauh lut.

Wenger-a naute hian tun hnai season nga chhung chu an khelmualah league bul an ṭan ziah a, vawi khat bak chakni hmel an hmu lo, kuminah pawh chak lo leh tura ngaih an ni hman - record duhawm lo an kalsan theih avangin thawk huaina tham a tling ang.

Arsenal hian point thum an hmuh avangin an lawm ang a, an lawmna belhchhah tur chu player thar Lacazette-a'n a goal shot hmasa ber goal-a a chantir thei kha a ni ang. Defender thar Saed Kolasinac tharum ngah zia hmuh turin a awm nawn leh a, Bosnia international hian mahni hmasial lo takin Welbeck goal khung tur a siamsak bawk.

Player rinawm Giroud

Nipui bazarah Wenger-a'n a player manto ber ni turin Lyon

aṭangin Lacazette a lalut a, a neih sa Giroud a ring zo lo tih a chian bakah season hmasa ang bawkin khelhna hmun a chang mumal dawn lo tih a hriat theih. Mahse, Gunners tan match 231 a khelh aṭanga goal 97 khungtu hian club dang zawm aiin Emirates Stadium-a cham zui zel a thlang.

Giroud chungchang sawiin Gunners manager Wenger chuan, "Striker kan ngah avangin atan chhuahna kawngka ka hawn sak. Mahse, a tawpah chuan kan hnena cham zui a thlang, a thutlukna avang hian ka lawm hle," tiin a sawi. Wenger hian bench-ah inkhel boruak thlak danglam thei khawpa ṭha player an neih thu leh a naute khelh dana a lungawi thu a sawi bawk.

Chakna goal khungtu Giroud chuan, "A tam thei ang ber khelmuala hun hman ka duh a, ka thil tum ber erawh kan club hian a thil tum ang a thlen theih nana puih a ni," tiin a sawi.

Inkhel dang

Inrinni zan Premier League inkhel dangah Frank de Boer-a kaihhruai Crystal Palace chu Huddersfield Town lakah 3-0 in an tlawm. Kai thar Huddersfield tan hian an player manto ber striker Steve Mounie chuan goal hnih a khung bakah Palace defender Joel Ward chuan an mahni lamah a tilut palh bawk.

Selhurst Park-a Huddersfield tana inkhel bul ṭantu zingah forward Tom Ince chiah Premier League-a tawnhriat nei a ni a, player 10 dang ten daingai loh ram an dai vawi khatna a ni - hnehna an chan hi Terriers fans chuan an theihnghilh tawh ngai lo ang.

English manager zinga season hmasa-a a naute thlen san pui thei ber Tony Pulis-a kaihhruai West Brom tan player thar Ahmed Hegazi-a'n a league match hmasa berah chakna goal a khung nghal a, an elpui Bournemouth lakah 1-0 in an chak.

Inkhel dangah Southampton leh an mikhual Swansea City te chu goal awm loin an inhnehtawk thung. Saints striker Manolo Gabbiadini-a'n goal ban a tihper a, midfielder Dusan Tadic leh defender Maya Yoshida ten hnai tak aṭang an khung ṭhelh bawk avangin Swans an him.