City an la hriam lo

Premier League cham­pion tura rinkai Manchester City-in Inrinni zan khan kai thar Brighton & Hove Albion 2-0 in an hneh a, Amex Stadium-ah point thum hlawh chhuak mah se Pep Guardiola hoten goal khung an harsat.

Brighton hian 22% chiah ball an chang a, point khata an lungawi avangin goal venhim hna an thawk. City hian minute 70-naah an goal hmasa ber an khung chauh a, Brighton midfielder Dale Stephens tihsual vang chauh a ni, David Silva pass chu Sergio Aguero-a'n a ti goal.

Minute nga hnuah City goal hnihna hi Brighton defender Lewis Dunk-a'n an lamah a tauh goal a, Pep Guardiola hoten ball chang tam mah se goal dang an khung belh lo. Chutihrualin City-in nipui bazara sum an hman tamna ber chu tlarhnung thuam ṭhat nan a ni a, goal an chhuah loh bakah wing back pahnih Kyle Walker leh Danilo ten mual sir aṭangin goal nawr an pui ṭha hle.

Barcelona leh Bayern Munich boss hlui Guar­diola chuan, "Match hmasa ber hi a danglam a, a bik takin kai thar hi khelh an harsa zual a, chak duhna an ngah bakah pressure an nei ve lo. Liverpool leh Chelsea inkhel result aṭangin Premier League harsat zia a lang a, helai hmunah chuan match zawng zawng hi a harsa vek a ni," tiin point thuma a lungawi thu a sawi.