Rooney-a'n ropui takin bul a ṭan

Wayne Rooney-a'n kum 13 hnuah Everton kawr a ha leh tawh a, Goodison Park-a a inlan hmasak berah chakna goal a khung. Hun ropui tak tak tawng tawhtu English striker chuan 'hun danglam bik' tiin Stoke City laka a chakna goal khung chungchang a sawi.

Inrinni zan Premier League inkhelah Everton tan Rooney-a'n first half injury time-ah Dominic Calvert-Lewin cross chu a tauh lut a, hei hi inkhela goal awmchhun a ni. Kum 31 mi Rooney hian kum 2004 khan Everton chhuahsanin Manchester United a zawm a, Toffees ṭantu ṭhenkhatten phatsantu ang hialin chhuah mah se English striker thin­lungah Everton a thi ngai lo a, goal a khung chiaha a hmel lan danin engkim a sawifiah.

Dark Horse Toffees

Premier League-ah Chelsea, Tottenham Hotspur, Manches­ter City, Liverpool, Arsenal leh Manchester United te thawm a len avangin Everton hming an lam ri tam tawk lo. Toffees hian Jordan Pickford chu pound maktaduai 30-in Sunderland aṭangin an lalut a, British goalkeeper manto ber hian hun tawp hmain Xherdan Shaqiri goal khung tur a dan sak a, clean sheet-in bul a ṭan nghal.

Toffees player thar dang Ajax captain Davy Klaassen leh Michael Keane te pawhin bul an ṭan a, game hmuhnawm tak khel la chhuak lo mah se United aṭanga an laklet Rooney-a'n chakna goal a khung a, Dutch manager Ronald Koeman-a'n team thar a din mek. Everton hi champion turin an ṭha tawk lo a, amaherawhchu club lian point chhuhsak thei tur an ni a, season tharah European competition khelh an tum bawk ang.

Stoke City-in Everton angin sum an hmang tam lo a, Chelsea aṭanga an hawh defender Kurt Zouma-a'n tlarhnung a tiphui a, kum 33 mi Darren Fletcher chu Potters player zinga ball pass tam ber a ni. English manager Mark Hughes hote an tum a san a rinawm loh, Premier League khel thei tura an inhamtan theih chuan an lungawi ang.

Rooney chu le

Rooney hian kum 2002 khan Arsenal lamah Premier League-a a goal hmasa ber a khung a, hetihlai hian kum 16 chauha upa a ni. English striker hian kum 31-a upa a nihin league-a a goal 199-na a khung a, goal hmasa ber a khung angin thawm nei lian tawk lo mah se a naupan tet aṭanga a club ṭan tana a khung a nih avangin a hlut dan tur hi teh thiam mai theih a ni lo ang.

Everton boss Ronald Koe­man chuan, "Wayne hian a khelhna position-a ṭha ber zinga mi a ni tih a lantir a, khelmualah a tlangnel a, thutlukna dik a siam a, goal ropui a khung," tiin Rooney a fak.

Toffees hian August 17, Ni­ngani zanah Croatian club Hajduk Split nen Europa League Playoff an khel ang a, August 21 zanah Manchester City an hmachhawn leh bawk ang. Stoke City hian August 19, Inrinni zanah Arsenal an mikhual thung ang.

Rooney Stats
• Rooney hi Premier League team pakhat tana inlan kar hla ber a ni a, United a zawm hmaa Everton tana inlan leh tuna a inlan inkarah hian ni 4,837 a tla hman.
• English striker hian club pakhat tana goal khung inkar hla ber record a siam bawk. (Ni 4,869)
• Premier League ṭan nia goal khung tam lamah Rooney aia tam an awm loa, Everton striker hian Alan Shearer leh Frank Lampard te nen league ṭan niah goal riat ve ve an khung.
• Rooney tan Premier League goal 300-a a inrawlhna chiah a ni a, goal 199 khungin assists vawi 101 a nei tawh a. Alan Shea­rer (324) chiah a tluk tawh lo.