A tawpah Farah pahnihna

British distance runner Mo Farah-a'n an ram intlansiak a hmachhawn hnuhnung berah pakhatna dinhmun a luah phak lo. Inrinni zan khan World Championship 5,000m intlansiakah pahnihna dinhmun a luah.

London Stadium-a inelna neihah Ethiopia tlangval Muktar Edris chuan minute 13 leh second 32.79 chhunga thlengin pakhatna a ni a, tun hnai kum ruk chhunga Farah hneh thei awm chhun a ni.

Kum 34 mi Farah chuan, "Hmun tiam kan thlen hma kha chuan ka beidawng lo, ka theihtawp ka chhuah a, kha aia chak zawka tlan tur chuan theihna ka nei bik lo," a ti.

London leh Rio Olympic-a 10,000m leh 5,000m intlansiaka gold medal latu Farah chuan sawi zawmin, "Zin kawng thui leh hautak ka zawh a, mahse hun nuam tak chu a ni," tiin a sawi.

Farah hian major championship bikah gold medal 10 leh silver pahnih a la thei a, tun inelnaah hian kar hmasa khan 10,000m huangah gold a dang tawh bawk.