Mizoram Lockdown (inkharkhip) 122

Football khawvela tlarhma inkawp fuh bera sawi chu Barcelona tana Lionel Messi, Luis Suarez leh Neymar inkawp kha a ni a, hetihlai hian hming lem atan MSN pek an ni. MSN-in Barcelona-a season an hman ho hmasak ber chu 2014-15 season kha a ni a, he season-ah hian goal 122 zet an khung - La Liga, Copa del Rey leh Champions League nomawi chawiin treble champion an ni bawk. 

Messi chu goal khung hnem ber niin match 57-ah goal 58-a khung a, Neymar chuan match 51-ah goal 39-a khung bawk. Barca-a a season khatna hmangtu Suarez chuan inelna hrang hrangah match 43 khelin goal 25-a khung thung. Barca tlarhma pathum hian 2015-16 season-ah goal 131 ngawt an khung leh - Suarez chuan khung hnem berin match 53-ah goal 59-a khung a, Messi (49 matches, 41 goals) leh Neymar (49 matches, 31 goals)-te pawn an khung tlem lo hle. 

MSN hian 2015-16 season-ah pawh hian La Liga leh Copa del Rey nomawi an chawi a, an season hnuhnung ber 2016-17 ah goal 111 an khung. Neymar chuan Barca-a a season hnuhnung berah hian match 45 khelin goal 20 a khung. Suarez chuan match 51-ah goal 37-a khung a, Messi chuan match 52-ah goal 54-a khung - MSN hi an season hnuhnung berah erawh an ropui tawk lo a, Copa del Rey-ah chiah an champion. MSN hi 2016-17 season zawh hnuah Neymar-a'n Messi hliahkhuhna aṭanga talchhuah a duh avangin Paris Saint-Germain lam a pan san - khawvela tlarhma inkawp hmuhnawm ber pawl chu a tawp.