Ballon d'Or 2020 an sem dawn lo!

Football khawvela mimal chawimawina ngaihhlut hlawh ber tih ngam Ballon d'Or 2020 chu Covid-19 vangin sem a ni dawn lo a, he chawimawina sem ṭhintu France Football magazine chuan, "He hun harsaah hian award sem chi niin kan ngai lo," an ti. 

Kum 1956 aṭanga he chawimawina chawl loa la sem ṭhin France Football chuan, "Kum dang nena khaikhin chi a ni lo a, Covid-19 vanga league tam tak tihtawp a nih avangin thlei bik nei loa he award sem a nih ṭhinna chu a theih lohah kan ngai a ni," an ti. European top five league zingah Ligue 1 chu Covid-19 vanga tihtawp awmchhun a ni a, Bundesliga leh La Liga khelh zawh tawh a nih laiin Premier League leh Serie A an la khel mek bawk. 

Hetihlai hian Champions League leh Europa League chu season dang anga kalpui theih a ni lo - Champions League hi quarterfinal aṭangin Portugal-ah mini-tournament a khelh a ni dawn a, Europa League chu last 16 khelh la hmabak aṭangin Germany-ah khelh a ni dawn bawk. 

Barcelona forward Lionel Messi chuan nikum khan Ballon d'Or hi record siamin a vawi ruk nan a dawng a, US striker Megan Rapinoe chuan hmeichhe lamah a dawng bawk - kum 21 hnuai lam player ṭha ber dawn ṭhin Kopa Trophy leh goalkeeper chawimawina Yashin award pawh sem a ni dawn lo. 

Ballon d'Or hi kum 1995 thleng kha chuan European player chiahin an dawng thei - hemi hnuah hian European club-a player tawh phawt tan tih a ni leh a, kum 2007 hnuah khawvela footballer ṭha ber thlan nan hman zui a ni. 

France Football-a editorial staff-te chuan player ṭha zual 30 hming an chhawp chhuak ṭhin a, heta ṭang hian khawvel ram tin aiawh journalist pakhat ṭheuhin Ballon d'Or dawng tur hi an thlang leh ṭhin.