Spurs khelmualah City; Foxes lenchilh tur Blues

Premier League-ah Liverpool chu champion chiang tawh anga sawi ngam an ni a, thilmak danglam tak a thleng a nih loh chuan Jurgen Klopp-a naute an champion ang. 

Mahse, Liverpool kal fal hian Premier League ngaihnawmna a thai bo pha lo a, season thara Champions League khelh tum boruak a ngaihnawm dawn chauh. 

Jose Mourinho enkawl Tottenham Hotspur chuan Pep Guardiola kaihhruai Manchester City chu Pathianni zan dar 10:00-ah an mikhual dawn a, manager pahnih vang chauh pawhin he inkhel hi en châkawm a tling. 

Leicester City-in zanin dar 6:00-a Chelsea an mikhual tur pawh hi a boruak a 'hot' dawn tih a chiang a, zan dar 11:00-a Manchester United-in Wolves an mikhual tur hi Champions League 'race' zinga chhiar tel loh chi a ni lo. 

Spanish football-a Barcelona leh Real Madrid an enkawl aṭang tawhin coach pahnihin boruak an nei lian tawh a, United leh City lamah an chhunzawm leh zat bawk. 

Tunah erawh Mourinho-a'n Spurs a enkawl tawh a, Pep-a'n City a la enkawl reng thung - City-in point 19 ngawtin Liverpool an thlau tawh a, Champions League an khelh ngei a rinawm thung. 

Spurs erawh table-ah parukna an ni mek a, palina Chelsea chu point rukin an thlau mek - chumi awmzia chu City aiin Tottenham tan 'pressure' a na zawk tihna a ni a, Mourinho tan tlawm a pawi dawn. 

London club hian Moussa Sissoko, Harry Kane leh Ben Davies te an la chhawr thei dawn lo a, Kane tel loa City ngam hi thil harsa tak a ni dawn tih a chiang. City coach Pep chuan Aymeric Laporte, Fernandinho leh Benjamin Mendy te an chhawr theih a rin loh thu a sawi ve bawk. 

November khan Spurs-in Mauricio Pochettino an ban a, a hmun ruak luah turin Mourinho an lalut. Portuguese manager ṭawng tam ve tak hna tur chu top four-a season khar a ni ang. 

Mourinho hi Chelsea-in an ban hnuah sawi hat kai khawpin Manchester United-in an lalut a, Red Devils-in an beisei ang result an neih loh avangin an ban zui ve leh. 

Real Madrid boss hlui hian 'manager ṭha tak a la ni reng' tih pholang turin Spurs hi Champions League a khelhpui ngei a ngai a, hei hi a hlawhtlinpui thei lo a nih chuan Mourinho tan club lian dang enkawl chhunzawm a har tawh ang. 

Spurs hian Netherlands forward Steven Bergwijn chu  PSV Eindhoven aṭangin pound maktaduai 27-in an lalut a, kum 2025 thleng contract ziaktu hi an chhawr nghal erawh a rinawm chiah lo. 

King Power Stadium-ah Chelsea-in Tammy Abraham an chhawr theih dawn leh dawn loh a chiang lo a, Christian Pulisic leh Ruben Loftus-Cheek chu inlan thei lo tur chiang an ni. 

N’Golo Kante leh Reece James dinhmun a chiang lo bawk a, Chelsea tan hna a awlsam dawn lo. Blues hian hnehna an chan chuan point rukin Foxes nen an inkar an ti zim ang a, Spurs, United leh Wolves an tlansan zel thei bawk ang. 

League Cup semifinal-a chak lo hlim Leicester hian an striker chhuanvawr  Jamie Vardy an chhawr thei dawn thung a, Nampalys Mendy tih loh player langsar inhliam an nei lo. 

Foxes hian team lian an hmachhawnin 4-3-3 formation an hmang a, counter attack-ah innghatin Wilfred Ndidi chu midfield-ah goal nawr tur dang chattu a ni ang a, tlarhmaah Vardy tlan chakna chhawr leh an tum ang.