Vawiin tlai dar 3:00-ah I Day Football Final Chanmari FC vs Chhinga Veng

Independence Day-ah Great Sports I Day Football final khelh a ni dawn. Tlai dar 3:00 hian Chanmari FC leh Chhinga Veng FC ten nomawi an inchuh ang.

Mipui an pawimawh
Kum 2013 khan Chanmari FC-in H. Vanlalthlanga kaih­hruaina hnuaiah I Day Football nomawi an la tawh a, he mi hnu hian Thlanga leh Chanmari FC-in nomawi ngaihhlut hi an la chawi leh lo.

Chhinga Veng coach Lal­­sang­zuala Hmar-in team en­kawltu lu ber a nih hnuah I Day Football nomawi a la chawi lo a, hei vang hian Chhingcows boss hian I Day Football chu Mizoram chhung inelnaa a nomawi chawi châk ber a nih thu Vanglaini a hrilh tawh.

Chanmari nge nomawi chawi châk zawk Chhinga Veng tih chu entu mipui aṭangin a hriat dawn a, Chanmarians-in an banner lian leh khuang pui an thawhpui ngam lo a nih chuan final khelh an hauh hmain Chhingcows lakah an tlawm a tih theih ang.

Mualphona
Mizoram Premier League champion Chanmari FC hi tun hma zawngin Chhinga Veng nen khaikhin an ni ngai lo a, Chhingcows chunga leng an ni.

Amaherawhchu tun season-ah Chhinga Veng hian season liam ta MPL champion puitu coach Sanga bakah player pawimawh captain Lalrinchhana, defender Ramfangzauva, midfielder Lalrinchhana leh forward Mal­sawmfela te an chhuhsak a, season ṭan hma hauhin Chhing­cows an lian zawk.

Chanmari FC-in veteran coach Thlanga an la let chung pawhin Sanga hnuaia team intuai thar hi an ngam lo. Chhinga Veng hian MFA Super Cup nomawi an chawi ṭumin Chanmari FC an hmachhawn lo a, I Day Football group stage-ah an intawng. Sanga hnuaia khel Chhingcows-in Thlanga kaihhruai Chanmari FC chu 5-1 in an sawp. MPL champion an mualpho.

Insiamṭha
Chanmari FC coach Thlanga chuan, "Tihfuh tawk loh ka nei a ni. Final-ah chuan kan intawn hmasak ṭum nen chuan a danglam tawh ang," tiin a sawi a, veteran coach thu sawi hi a thleng dik a nih chuan final hmuhnawm thlir tur a awm ang.

Chanmarians hian Chhing­cows an hneh loh hnuah Chan­mari West leh Aizawl FC an hneh a, an insiamṭhaah a ngaih theih. Chanmari FC coach Thlanga'n a player neih dan leh an theihna a hre chho ṭan a, hei aia pawimawh chu Chhinga Veng ṭhatzia a hre tawh a, nawr hun leh fimkhur hun a thlan fuh chuan Chhingcows tan hna a awlsam dawn lo.

Chhinga Veng coach Lal­sangzuala Hmar pawhin, "Kan inkhelh tawhna leh kan player neih dan kan thlir nasat lutuk chuan kan tisual ang. A pawimawh ber chu khelmual chhunga khelh ṭhat a ni a, theihtawp kan chhuah a ṭul a ni. Chanmari FC chu Chanmari FC an ni," tiin an khingpui tur team chu sawp tawh mah se a dah hniam lo.

Chhingcows hian final lut turin match ngaah goal 23 an khung a, Sanga hnuaiah vawi 11 an chak zawn tawh bawk. Amaherawhchu Chhinga Veng tlarhnung a phui bik lo a, I Day Football-ah clean sheet an nei lo a, an match hnuhnung berah Bethlehem Vengthlang 2-1 chauha an hneh bawk avangin champion tura rinkai Chhingcows hi chesual thei an ni.

Lawmman
I Day Football champion hian Rs 1,00,000 an dawng dawn a, pahnihnain Rs 50,000 an hawn bawk ang. Top scorer leh best player a awm ang a, Rs 3,000 ve ve an dawng dawn.

Goal khung tam ber Chhinga Veng forward Malsawmfela'n goal ruk a khung tawh a, Ramhlun South tlangval hian MFA Super Cup-ah khan goal 11 khungin top scorer a ni tawh bawk. Sawmfela hnuaiah hian goal li khung Chhinga Veng forward pahnih MS Dawngliana leh Laldampuia bakah Mizoram Police forward Lalfakawma te an awm bawk.

Chanmari FC player zinga khung tam ber PC Zosang­lianga'n goal hnih a khung tawh a, amaherawhchu New Builum tlangval hian match li chhung goal a khung tawh lo.

Inkhel en man Rs 30/- a ni a, school nau-pang uniform ha tan man chawi a ngai lo.

FINAL KALKAWNG
CHANMARI FC
Group Stage
Chanmari FC 4 - 0 Mizoram Police FC
CFC : PC Zosangliana 4', 49'; Jacob Vanlalhlimpuia 20'; C Lalrosanga 53'
Rhino Charge 0 - 1 Chanmari FC
CFC : Vanlalbiaa Chhangte 43'
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46'; Laldampuia 61', 86'
Chanmari FC 1 - 0 Chanmari West
CFC : R. Lalthanmawia 47'(OG)
Semifinal
Aizawl FC 1 - 2 Chanmari FC
AFC : Rochharzela 17'
CFC : Thomas Lalengkima 90+4'; Thasiama 103'
CHHINGA VENG
Group Stage
Chhinga Veng FC 5 - 1 Chanmari West FC
CVFC : Malsawmfela 9'; MS Dawngliana 45'; Lalmawizuala 47' (OG); Laldampuia 69', 83'
CWFC : Lalnunmawia 30'
Mizoram Police 2 - 5 Chhinga Veng
MPFC : Lalfakawma 3'; B. Zoramthanga 10'
CVFC : Malsawmfela 21', 76'; R. Laldinliana 62'; MS Dawngliana 62'; Lalkhawpuimawia 79'
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46'; Laldampuia 61', 86'
Chhinga Veng FC 6 - 1 Rhino Charge
CVFC : Laldingheta 14'; Malsawmfela 16'; K. Lalthlahlova 66'; Lalkhawpuimawia 69'; Vanlallawma 81'; Laldingngheta 87'
RHI : Lalneihkima 85'
Semifinal
Chhinga Veng FC 2 - 1 Bethlehem Vengthlang FC
CVFC : R. Malsawmtluanga 16'; Malsawmfela 63'
BVT : Ramengmawia 53'