Hmeichhe I Day Football Final-ah zirna in lian 2

Vawiin chhun dar 1:00 hian Lammualah MFA buatsaih, hmeichhe pual bik Great Sport Independence Day Cup 2017 final-ah zirna in lian pahnih Pachhunga University College leh Hrangbana College te an inhmachhawn dawn.

PUC hian final lut turin nimin khan Govt Aizawl North College chu 14-0 zetin an sawp a, Grace H Lalrampari'n vawi riat zet goal a khung bakah Lalnunmawii'n hattrick a siam a, Vanlalhriatkimi (2 goals) leh H. Lalhmingmawii ten an pet goal bawk.

PUC hian Govt Aizawl College chu 7-1 in an sawp tawh a. Final kalkawngah harsatna an tawk lo a, Group B-ah team dangin an elpha lo.

Final lut hmasa zawk Hrangbana College-in group stage-ah an elpui tawk an hmu bik lo. HBC hian T. Romana College 5-0 in an hneh a, Women's Polytechnic 8-0 a sawp lehin group hmahruaitu an ni a, final lut turin goal an chhuah lo.

Zirna in lian pahnih inkhel tur a nih avangin khelmual chhung leh pawn boruak a lian nghal a, entu an tam dawn tih a chiang a - tu nge tam zawk ang tih erawh vawiin chawhnuah a chiang ang.