Rin hlawh lo McGregor

August 26-a Floyd Mayweather nena inhnek tur Conor McGregor-a'n chanchin a ngah sawt hle. Tun hnaiah a sparring partner Paulie Malignaggi a hnek tlu lai ni awm tak thlalak a tihchhuah avangin WBA welterweight champion hlui hian McGregor camp a chhuahsan a, Paulie hian a video pumpui tichhuak turin a cho nghal.

Paulie chhanna ang­rengin UFC president Dana White-a'n McGre­gor leh Malignaggi inhnek lai video tawite a ti chhuak a, a nam thluk leh thluk lohah boxing ngainatute an inhnial laiin boxing khawvela boxer hlawhtling tak tak ten Irish fighter hi an dah sang lo hlawm hle.

A hunlaia weight division pathum champion ni thei Shane Mosley chuan, "McGregor khan Malignaggi nena an in sparring-naa a hnek ang lek khan Mayweather a hmachhawn hunah a kut a vai chhuak a nih chuan eng ti kawng mahin Floyd a hnek fuh lo ang," a ti!

Boxing legend leh boxer zinga dollar mak­taduai 100 hnek chhuak thei hmasa ber Sugar Ray Leonard chuan, "Mc­Gregor hi fighter ropui tak a ni a, mah se Floyd hneh a tum a nih chuan a video-a a lan dan aia ṭha zawk hian a kut a hman thiam a ṭul ang,"a ti.

IBF and USBA super featherweight champion hlui Steve Forbes chuan, "A technique a dik lo a, a ban vai dan en hianin a kut lek chhuah dan hrim hrim a dik lo. Floyd erawh a thiamin a na em em a, a hnek tin mai hi chemtea in vih ang mai a ni," tiin a sawi. Forbes hi tun hnaiah McGregor-a team te chuan sparring puiah an sawm a, a hnar. Tun hmain Mayweather hi sparring a lo neihpui tawh ṭhin thung.

Division hnih boxing champion ni tawh Jessie Vargas, WBC super middleweight champion Badou Jack leh IBF welterweight champion Shawn Porter-te pawhin Mcgregor aiin Mayweather an dahsang vek - engkim chian hun tur erawh August 26 a ni.