AIFF leh MFA-in referee tam zawk chher tum

All India Football Federation (AIFF) leh Mizoram Football Association (MFA) ṭangkawpin Mizoram a football referee tam zawk leh ṭha zawk chher chhuah tuma hma an lakna, Referee Development Course 2017 chu nimin khan Rajiv Gandhi Stadium, Aizawlah ṭan a ni - referee nih tum mi thar 70 an inziak lut tawh.

Mizoram State Sports Council hnuaia sports promotion officer H. Thangchungnunga chuan ni ruk awh course hi a hawng a, course hawnna inkhawm tawi hi MFA referee committee chairman C. Vanlalmawia chuan a kaihruai thung.

H. Thangchungnunga chuan in­fiam­na chu kawng tinrenga hma­sawnna thlentu a nih dan sawiin, Football Referee te chu midang in­nghahna tlak dikna kengkawh ngam turin a chah a. Mite zah tlak a nungchang ṭha nei tlat turin a fuih bawk.

MFA honorary secretary Lal­nghing­lova Hmar pawhin thu sawiin, India rama football referee te ham-ṭhatna hrang hrangte a sawi a; Mizoramin national player ṭhahnem tak a neihlaia national referee a nei hleithei lo chu rualawh a nat thu sawiin national referee tal thleng turin referee-te a cho bawk.

AIFF match commissioner Lalrawngbawla pawhin thu sawiin football referee leh official tiṭhate tan international match-a hlawh ṭha tak nei a duty theihna kawng a hnaihzia a tarlang bawk.

Nimina course hawn niah hian football referee nih tum ṭhalai 70 an inziaklut nghal a. AIFF Referee Department a mithiam pahnih S. Mohanty referee assesor leh Bikram­jit P-te chuan MFA Referee Committee-te nen ṭang kawpin ni ruk chhung an zirtir dawn a ni.

Referee Development Course-ah hian course-in a tum te, football dan hrang hrang te, a taka inkhel kaihruai dan, khelmual sira tlan dan, flag vai dan, fourth official mawhphurhna leh a tih tur, thubuai hlabuai a awma thutlukna siam dan tur, inkhel kaihhruai dan leh thil pawimawh tam tak chipchiar takin an zirtir dawn a ni.

Course-ah hian fitness test-te neih a ni ang a, a tawpah exam buatsaih a ni ang. Hlawhtlinna chang nghal lote tan pawh MFA chuan an kal chhunzawm zelna tur a ngaihtuah pui zel dawn niin MFA Referee Committee hotute chuan an sawi.