Hoffenheim hmaah Liverpool
Liverpool-in Champions League Playoff khel turin Germany an pan tawh a, Hoffenheim hmachhawn tura zin zingah Barcelona nena sawi zawm Philippe Coutinho a zin tel ve lo.
Zanin dar 12:15 hian Rhein-Neckar Arena-ah Hoffenheim leh Liverpool ten first leg an khel dawn a, Sony Ten 2-ah a en theih ang a, second leg hi Anfield-ah August 23, Nilaini zana khelh leh tur a ni. Playoff inkhel dangah Sporting Lisbon-in Steaua Bucharest an mikhual dawn a, Sony Ten 1-ah a en theih ang.
Bayern Munich aṭanga loan hmanga Hoffenheim zawmtu Serge Gnabry chuan, "Champions League Playoff hi chu inkhel dang daih a ni a, kan theihna zawng zawngin kan khel ang. Europe-a inelna sang ber khelh theihna chance kan nei a ni," tiin Liverpool an barakhaih theih a rinthu a sawi.
Liverpool coach Jurgen Klopp pawhin, "95% chauha kan khel chhuak a nih chuan Hoffenheim hian min pet chhuak ang. Season ṭan hmaa Bologna nena an friendly match khel kha ka en a, inrintawkna an ngah a ni," tiin an theihna zawng zawnga an khelh a ṭul thu a sawi a, Bundesliga history-a coach naupang ber kum 30 mi Julian Nagelsmann chu a fak bawk.