Juventus ngam loh Lazio-in nomawi chawi

Pathianni zana khelh Italian Super Cup-ah Lazio chuan Juventus 3-2 a hnehin nomawi an chawi. Lazio hian tun hnai vawi 11 an intawnah Juve hi an vawi khat hnehna chiah a ni.

Stadio Olimpico-a inkhelah Simone Inzaghi nauten forward Ciro Immobile goal hnih hmangin si hnih faia hma an hruaina chu Turin club tan Paulo Dybala-a'n a rul zo. Lazio tan hian hun tawp dawnah Alessandro Murgia chuan an goal thumna khungin extra time khelh ngai loin hnehna an chang.

Italian Super Cup hi Serie A champion leh Coppa Italia champion ten an khelh ṭhin a ni a, season hmasa khan Juventus-in heng nomawi pahnih hi an chawi avangin Super Cup-ah hian Coppa Italia finalist Lazio nen hian an inkhel.

Juve manager Massimiliano Allegri naute hian kuminah Serie A nomawi an kawl lai humhim turin hna hautak an hmachhawn ngei dawn niin a lang. Lazio bakah hian season hmasa pahnihna AS Roma, indin thar mek AC Milan leh Inter Milan bakah Napoli pawh sawi hmaih theih an ni lo ang - Juve hian an league match hmasa ber atan August 19 zan hian Cagliari an mikhual ang.