Marquez hmaah Dovizioso a thleng

Bike intlansiakna ngaihhlut MotoGP rider championship inum boruak a ngaihnawn chho mek zel. Pathiannia tlan zawh tak Austrian MotoGP-ah championship hmahruaitu Marc Marquez hmaah Andrea Dovizioso chu thlengin pakhatna a ni.

Spielberg-a intlansiakah pole position aṭanga bul ṭan­tu Marquez leh Dovizioso an inel tawk hle a, corner hnu­hnung ber an tlan thlengin pakhatna dinhmun la thei an ni. Ducati rider Dovizioso hian minute 39 leh second 43.323 chhunga thlengin pakhatna a ni a, pahnihna Marquez nen an inkarah second 0.176 bak a awm lo.

Tun hnai intlansiak hnu­hnung pahnih Germany leh Czech Republic GP lama hnehna changtu Marquez-a'n championship-ah point 174 hmuin hmahruaitu a nih chhunzawm a, kumina ṭum thum hnehna chang tawh Dovizioso (158 points) chuan a um ve zel.

Kum 31 mi Dovizioso chuan, "Marc nena inelna neih hi chu a nawm rualin a hautak thei hle. Corner hnuhnung berah khan chak thei ka ni tih ka hria a, chutihrualin point hloh vek thei ka nihzia ka hai bik lo. Huaisen taka ka beih rah ka dawng ta a ni," a ti. Italian rider hian kumtir lam khan Mugello leh Barcelona-ah te hnehna a chang tawh bawk.

Yamaha rider pahnih Ma­verick Vinales leh Valentino Rossi ten season bul ṭan fuh viau mah se tun hnaiah bei­sei an phak lo. Austrian Mo­toGP-ah hian Vinales chu paruknaah thlengin a hnung chiahah a teammate Rossi a thleng bawk. Season tir intlansiak hma­­sa pahniha hnehna chang thei Vinales hian hmahruaitu Marquez chu point 24 zetin a phak lo tawh.

Austrian MotoGP Result
# Rider Ram Team
1 Andrea Dovizioso Ita Ducati
2 Marc Marquez Spa Honda
3 Dani Pedrosa Spa Honda
4 Jorge Lorenzo Spa Ducati
5 Johann Zarco Fra Yamaha
6 Maverick Vinales Spa Yamaha
7 Valentino Rossi Ita Yamaha
8 Alvaro Bautista Spa Ducati
9 Loris Baz Fra Ducati
10 Mika Kallio Fin KTM
Championship standings
# Rider Ram Team Points
1 Marc Marquez Spa Honda 174
2 Andrea Dovizioso Ita Ducati 158
3 Maverick Vinales Spain Yamaha 150
4 Valentino Rossi Ita Yamaha 141
5 Dani Pedrosa Spa Honda 139
6 Johann Zarco Fra Yamaha 99
7 Jorge Lorenzo Spa Ducati 79
8 Jonas Folger Ger Yamaha 77
9 Cal Crutchlow GB Honda 76
10 Danilo Petrucci Ita Ducati 75