Ronaldo channa 'El Clasico'!

Pathianni zan khan Spanish football season ṭan a ni a, a hmuhnawm nghal - Spanish Super Cup first leg-ah Real Madrid leh Barcelona an inhmachhawn a, 3-1 in mikhual team-in hnehna an chang. Hei erawh theihnghilh loh a ṭha, second leg khelh leh a la ni dawn a, August 16 zanah Real hian Barca an mikhual ve leh ang.

Lionel Messi 'Lal' ram Nou Camp-a player langsar ber chu Cristiano Ronaldo a ni - Portuguse forward hian goal a khung a, Santiago Bernabeu-a Lionel Messi-a'n a goal khung lawm dan anga lawmin a kawr a phelh a, a hnu lawkah a 'dive' bawk avangin a yellow card pahnihna hmuin 'red card' pek a ni.

Boruak 'hot'

Nou Camp-ah club pahnihin hnehna chan tumin khel ve ve mah se goal erawh kan hmu lawk lo a, goal hmasa ber lut turin second half nghah thlen a ngai - a khungtu chu Gerard Pique a ni a, goal chhuahtu erawh Barcelona an ni! Spanish defender hian Marcelo ball cross chu an lamah a ti lut.

Minute 77-na a ni a, Real keeper Keylor Navas-a'n Luis Suarez a tih tluk avangin Barca-in penalty an hmu a, Uruguayan striker hi a tlu 'nem' hretah ngaih ni mah se referee-in penalty a pek miau avangin Messi-a'n goal-ah a chantir. Minute hnih hnu lawkah Ronaldo-a'n khung ve lehin Real hma a hruaipui a, a goal lawm nan a kawr a phelh avangin yellow card pek a ni.

Ronaldo = Out

Portugal captain-in uchuak takin a goal khung a lawm a, minute hnih hnua a thiltih chu 'dive' a ni. Portuguese forward hi Samuel Umtiti nen ball an inchuhna lamah Luis Suarez tih thik ni awm takin a tlu a, penalty a beisei laiin a chhanna chu yellow card a ni - a kawr phelh vanga yellow card a hmuh tawh avangin hnawhchhuah a ni a, Real an lungawi lo hle.

Barcelona-in an khelmuala an khelh avangin Ronaldo chantu Real lakah 'comeback' an lantir ngei beisei ni mah se rin loh zawk Real bawkin goal an khung a, yard 25 vela hla aṭangin Marco Asensio chuan goal 'cial' a khung - kum 21 mi attacking midfielder hian La Liga, Copa del Rey, Champions League, UEFA Super Cup leh Spanish Super Cup-a Real tana a match hmasa berah goal a khung ta vek!

Future ava bright lo em!

Cristiano Ronaldo-a'n red card a hmu a, kum 32 mi forward hi a tawnhriat leh thiamna ngaihtuaha in control thei viau tura ngaih a nih laiin harsatna a insiam belh - a chhuak turin referee chu a hnung lam aṭangin a nam a, Portugal captain hi match li aṭanga match 12 thleng inkhel thei lo tura hrem hmabakin a awm mek.

He inkhela referee Ricardo de Burgos Bengoetxea chuan, " Cristiano Ronaldo khan red card a hmuh khan a lungawi lo chuan na lo tein ka hnungah min nam a ni," tiin report-ah a ziak a, Royal Spanish Football Federation (RFEF) dan bu Article 96-ah chuan, "Player chuan official a nam a nih chuan match 4-12 thleng hrem theih a ni ang," tiin a inziak a, Ronaldo hmabak a eng lo hle.

Neymar tel lo Barca

Barcelona-in khawvela tlarhma hlauhawm ber tia an sawi MSN an nei tawh lo a, Lionel Messi leh Luis Suarez awm mah se pound maktaduai 200 man Neymar-a awm loh a lang hle. Brazil captain-in France-ah goal leh assist nei chunga a match hmasa ber a hman laiin Neymar tel lo Messi leh Suarez ringawt an hmuhnawm tawk lo a, MS kawp tura luhtir Gerard Deulofeu-a'n besei a phak lo.

Everton aṭanga Barcelona-in an lak kir Deulofeu hian pre season duhawm tak a hman avangin beisei a sang a, box chhung aṭangin vawi hnih ngawt chance duhawm tak a hlah - 'Neymar chu ni se' tiin Barca fans an indawm kun ngei ang. Thil chiang tak lang chhuak chu Barca-in Neymar thlaktu an mamawh tih hi a ni a, tun dinhmunah chuan an beisei Philippe Coutinho leh Ousmane Dembele te an la rim hlawhtling rih lo ve ve bawk.

Zidane a lawm lo

Real Madrid coach Zinedine Zidane chuan, "Referee-te hnathawh dan tur sawi chi ka ni lo. Game ṭha tak kan khel a, ka buaina erawh Cristiano Ronaldo hnawhchhuah a ni kha a ni. Penalty pekna tur a ni lo a ni mai thei a, mah se red card pek erawh thutlukna kha a khawng mah mah a ni. Mahse, player 10 nichungin beiseina kan nei a, a tawp thlengin kan bei. Kan result-ah ka lawm a, mah se second leg a la awm tih erawh hriatreng a ṭul," a ti.

Barcelona boss Ernesto Valverde chuan, "Kan dinhmun kha goal lut zat aṭanga teh chi niah ka ngai lo. Goal thum an khung ngei a, mah se kan khel ṭhain chance pawh vawitam kan nei a ni. Goal hnihna an rawn khung chiah khan min vaw chau a, hnehna an chan avanga ka lawmpui rualin second leg khel turin kan inbuatsaih nghal ang," tiin a sawi.