Mangṭha athletics - Usain Bolt
Usain Bolt chuan a tan athletics a tawp thu leh World Championship zawh rualin infiamna khawvel a mangṭha tak thu a sawi chhuak ta.
Kum 30 mi Bolt chuan, "A nihna tak sawi chuan ka tan kal liam a hun ta. Min ṭantu mipui leh he infiamna khawvel hi mangṭha tihin ka thlah liam ta e," tiin a sawi.
Jamaican sprinter ropui hian Olympic Gold medal pariat a kawl mek a, World Championship-ah gold 10 chuang a hlawh chhuak tawh bawk. Tun ṭum World Championship-ah erawh beisei a phak lo - 100m inelnaah pathumna a ni a, 4x100m relay an tlan laiin a inhliam vangin a tlan tluan thei lo.
Infiamna huangah a rawn kir leh ang em tih zawhna chhangin Bolt chuan, "Mi tam tak an chawlh hnua rawn kir leh ka hmu tawh ṭhin, beisei angin thil a thleng tawh ngai lo a, an mualpho zawk mai a ni. Khatiang mi chu ka ni ve lo ang," tiin a thutlukna siam tawh chu sawh sawn a tum hmel loh hle.
A hun hnuhnung chungchang sawizuiin Bolt chuan, "10m intlansiaka hnehna ka chan loh hnu khan mi ṭhenkhat chuan Usain lungngai suh, Muhammad Ali pawh a inhnek hnuhnung berah khan a chak lo, min ti. Hei hi kei pawh ka ngaihdan a ni, ka sulhnu kha a hliah khuh turah ka ngai lo," a ti.
Bolt hi tun hnai Oylmpic hnuhnung vawi thuma athlete ngaihven hlawh ber pakhat a ni a, tun ṭum World Championship-ah pawh hian hliam lo se la chuan medal pakhat aia tam a hlawh chhuak ngeiin a rinawm.
Mipa 100m leh 200m world record chelhtu Bolt chuan, "Ka theihna tak hi vawi tam ka fiah tawh a, ka career zawng zawngah khan khawvela ṭha ber ka nih zia chu ka fiah chho char char tih theih tur a ni. Tunah erawh infiamna khawvel tan mangṭha tih thu ka sawi ta," tiin a sawi.