United thawm a lian nghal

Romelu Lukaku-a'n Man­chester United ṭantute hnena inhmelhriattir nan Old Trafford-ah goal hnih a khung nghal. Jose Mourinho hoten Pathianni zan khan West Ham 4-0 in an sawp a, goal difference hmangin Premier League hmahruaitu an ni.

Pound maktaduai 75 man striker Lukaku bakah substitute Anthony Martial leh Paul Pogba ten United tan goal khat ve ve an khung bawk.

Hmel thar

Mourinho-a'n tun nipui trans­fer-ah Everton striker Lukaku, Chelsea midfielder Nemanja Matic leh Benfica defender Victor Lindelof te lakluh nan pound maktaduai 150 dawn a seng.

West Ham an hmachhawn

ṭumin Lindelof squad-ah a awm lo a, Super Cup-a hrem vanga Real Madrid hmachhawn thei lo Eric Bailly leh Phil Jones te chu defence laiah an inkawp.

Hammers manager Slaven Bilic-a'n player thar Joe Hart, Pablo Zabaleta, Marko Arnautovic leh United player hlui Javier Hernandez a chhawr nghal vek a, inhliam vanga Manuel Lanzini, Andy Carroll leh Michail Antonio te an chhawr thei lo chungin an squad a la chhah ṭha hle.

A hmawr bawktu Lukaku

Season ṭan hmain United leh Alvaro Morata sawi zawm a ni a, Mourinho-a'n Belgian striker Lukaku a thlan zawk avangin Spanish striker-in Chelsea a zawm phah. Morata hian Blues tana league match hmasa berah goal a khung nghal a, David Luiz goal khung tur a siam sak bawk.

Portuguese coach-in duh a thlang sual tih ngaihdan a awm, Old Trafford-a Lukaku chhuah zalen a nih hnuah erawh Mourinho ngaihdan ṭawmpuitu an tam ang. Minute 33-naah Belgian striker hian Marcus Rashford thawhrah sengin goal a khung a, Lukaku hian minute 52-naah Henrikh Mkhitaryan-a freekick a tauh lut leh bawk.

Kum 24 mi Lukaku hian season nga chhung chu Premier League-ah goal 10 a khung tling ziah a, season liam ta kha a khung tam ber ṭum niin goal 25 a khung. Old Trafford-a a inlan hmasak ber dan aṭanga thlir chuan Lukaku hian a record neih sa hi a khum theih a rinawm.

Inkhelh banah Lukaku chuan, "Manchester United tana kan khelh chuan hna kan neih ṭheuh a, ka hna chu goal khung a ni. A pawimawh ber chu point thum hmuh a ni a, chutihrualin mipuiin inkhel hmuhnawm an hmu duh a, lantir zel kan tum ang," tiin goal khung chhunzawm zel a tum.

United hian season liam ta khan an khingpui vawi 15 zet an draw a, champion Chelsea-in an khingpui vawi thum chiah an khingpui an draw, Lukaku awm takah chuan an Red Devils hian an record duhawm loh tak hi an kal pel theiin a rinawm.

Nakruh bo an hmu

Chelsea duh loh Nemanja Matic chu United-a kim lo kimna chiah a ni a, Serbian midfielder hian goal khung lo mah se danglamna thlentu a ni.

Pound maktaduai 40 man Matic hian pass 69 a nei a, 11.41 km zet a tlan a, khingpuite vawi 9 a chhuahsak a, vawi 19 ball inchuhnaah hnehna a chang a, ball vawi 89 a khawih. Heng tehna zawng zawngah hian a khelpuite chungah a awm vek.

Kum 29 mi Matic hi goal nawr leh goal venhim kawng­ah a ṭangkai a, Henrikh Mkhitaryan leh Pogba ten zalen takin tlarhma an puih theih phah. Serbian midfielder hian ball a hloh lo a, ball pekchhuah a thiam avangin United-in game hmuhnawm tak an khelh theihna chhan a ni.

Inngaitlawm Mourinho

Manchester United manager Jose Mourinho chuan, "Inkhel harsa a ni. 2-0 a nih thleng pawh khan goal khung thei an ni a, kan inkhel kha 4-0

aṭanga teh theih a ni lo," tiin a sawi. United keeper David De Gea-a'n halftime hma chiaha Edimilson Fernandes goal khung tur a dan sak avangin Portuguese manager thu sawi hi a dik theihna chen awm mah se vawi 22 zet goal attempt an neih avangin chak harsa tih tur a ni lo.

Mourinho chuan sawi chhun­zawmin, "Tuna hmahruaitu kan nih hi engtihna mah a la ni lo a, ka tana pawimawh zawk chu kan khelh dan hmang kha a ni. Season liam ta khan West Ham lakah hian point hnih kan hloh a, tun ṭumah point thum kan hlawh chhuak. 2-0 kha chak pui thei kan ni a, inkhel thunun thlang loin goal kan khung belh a, kha kha hlimna a thlen a ni," tiin goal an khung tam avanga a lawm thu a sawi lang.

United hian kum 2006 khan league ṭan niah Fulham 5-1 in an sawp a, hemi hnua an chak chian leh ber chu tun ṭum hi a ni. West Ham manager Bilic-a'n United chu kawng tinrengah an hneh loh thu a sawi a, amaherawhchu match khat lek an la chak tih hriat a ṭha.

Mourinho hote hian season liam ta khan harsatna nei loin Bournemouth hnehin bul an ṭan a, parukna niin season tawp an khar. Kum li liam ta khan David Moyes hoin United-in Swansea 4-1 in an sawp a, hemi ṭuma an lawmna pawh hian season tawp a daih lo.