Federer hnehtu Zverev a champion

Alexander Zverev chuan Roger Federer hnehin Rogers Cup cham­pion a ni. German rawlthar hian tun season-ah no­mawi panga a chawina chiah a ni a - Masters 1000 title bik chu pahnih a lakna chiah a ni thung.

Pathianni zan khan Montreal-ah mipa final hi khelh a ni a, kum 20 mi Zverev hian harsatnna nei loin darkar khat leh minute riat chhung lekin 6-3, 6-4 in hnehna a chang a, khawvela player ropui bera ngaih Federer lakah vawi hnih hnehna a channa chiah a ni bawk a, Grand Slam champion hnem ber hi vawi hnih vek a hneh lo tawh bawk.

World number 8 Zverev hian kumtir lam khan Novak Djokovic hnehin Rome Masters nomawi a chawi tawh. Kum 2007 hnu lamah Federer, Rafael Nadal, Novak Djokovic leh Andy Murray te tih lohah season khat chhunga Masters 1000 title pahnih la leh thei hmasa ber a ni.

Swiss thiampuipa Federer hian kuminah a khel ṭha tluang hle a, match 38 a khelh tawh aṭangin ṭum thum a chak lohna chiah a ni. Rafael Nadal leh Federer te hian US Open inbuatsaihna tur pakhat Cincinnati Open-ah result ṭha an neih chuan world number 1 Andy Murray dinhmun an phetthla ngei dawn niin a lang ta.

Rawlthar beiseiawm Zverev chuan, "Tennis player tinin Masters 1000 nomawi chawi an chak vek a, kumina a vawi hnih nan ka chawi thei hi ka lawm takzet. Ka khel ṭha tluang a, player langsar leh ṭha zawk ka hmachhawn apiangin zir belh ka neiin hmasawn zel pawh ka tum," tiin a sawi.

Rogers Cup champion hian Rs 5,72,40,021 an dawn bakah Emirates ATP Ranking point 1000 an hmuh belh a, German player zingah Zverev hi Boris Becker (1986) tih lohah chuan he hmuna champion leh thei hmasa ber a ni.

Zverev hi a ball vuak a na a, a che rang bawk. Federer lakah hian winners vawi 20 vuain aces vawi ruk a siam bawk. Federer-a'n break point vawi thum a hmuh chu a pawtthla leh vek thei a, a khingpui service chhuhsak theihna hun ṭha ṭum thum a hmuh chu a chhawr ṭangkai vek thung. Tennis khawvela Big Four tia sawi ṭhin - Federer, Nadal, Djokovic leh Murray te hnulama player chhuak beiseiawm ber pawl a ni mek.